ऊर्जा क्षेत्रको विकासका लागि सरकार निरन्तर लागि परिरहनु आवश्यक छ

प्रकाशित मिति : Wed-15-Dec-1075
- सम्पादकीय

सरकारले आगामी चार वर्ष भित्र २ हजार ३९३ मेगावाट विद्युत उत्पादन गर्ने भएको छ । कुल ११० वटा साना तथा ठूला आयोजनाहरुको निर्माण सम्पन्न गरी विद्युत उत्पादन गर्ने भएको हो । आगामी चार वर्षमा जुनसुकै परिस्थिती सिर्जना भएपनि यी आयोजनाहरु निर्माण सम्पन्न गर्ने सरकारको लक्ष्य रहेको छ ।

सरकारले लिएको सोहि लक्ष्य अनुसार आयोजना निर्माण कार्यलाई तीव्र गतिमा अघि बढाईरहेको छ । सरकारले ऊर्जा तथा जलविद्युत आयोजनाको क्षेत्रप्रति लिएको यो लक्ष्य एकदमै सकारात्मक छ । सरकारको यो लक्ष्य पुरा गर्न सबैलाई हातमा हात र साथमा साथ दिन सरकारले हरेक नेपाली जनतालाई आवहन गरेको छ । ऊर्जा देशको आर्थिक विकासको मेरुदण्ड हो । देशको दीर्घकालिन र चौतर्फी विकास गर्न अन्य क्षेत्र भन्दा यस क्षेत्रले धेरै सहयोग पु¥याउने गर्दछ । ऊर्जा क्षेत्रको विकासमा सरकारले पनि प्रमुख प्राथमिकता दिइरहेको छ भने ऊर्जा क्षेत्रको विकासका लागि वैदेशिक लगानी आउने क्रम बढीरहेको छ । विदेशीहरुका लागि नेपालको जलविद्युतमा लगानी गर्न बाधक रहेको ऐन नियमहरु पनि केही हद सम्म परिमार्जन भएको छ । ऊर्जा क्षेत्रको विकासमा सरकारले अहिले जत्तिकै प्राथमिकता दिने हो र स्वदेशी तथा विदेशी लगानी आउने हो भने आगामी ४ वर्ष भित्रमा ११० वटा आयोजनाहरु सम्पन्न हुने देखिन्छ ।

यी आयोजना समयमा नै सम्पन्न भएको खण्डमा छिमेकी देश भारतबाट आयात गरिदै आईरहेको विद्युत आयात लाई कम गर्न सकिन्छ । त्यस्तै १० वर्षमा १५ हजार मेगावाट विद्युत उत्पादन गर्ने सरकारको लक्ष्य पुरा हुन सक्छ । यद्यपि ऊर्जा मन्त्रालयको सार्वजनिक गरेको १ वर्षे कार्यप्रगति विवरणमा राष्ट्रिय गौरवका आयोजनाहरुको काम भने तीव्र गतिमा हुन सकेको छैन । सरकारले आफ्नो लक्ष्य हासिल गर्नका लागि राष्ट्रिय गौरवका आयोजनाहरु लाई समयमा नै सम्पन्न गर्नुपर्दछ । जुन किसिमको गौरवको आयोजनाहरुमा पर्न गएको समस्या जतिसक्दो छिटो समाधान गरी आयोजनाका विकास कार्यलाई तीव्र रुपमा अघि बढाउनुपर्दछ ।