४ असोज, काठमाडौं । काठमाडाैं उपत्यकामा विद्युतीय बस संचालनमा ल्याउने योजना हल्लामा मात्र सीमित बनेकोछ । काठमाडौं महानगरपालिकाका प्रमुख कार्यकारी अधिकृत रुद्रसिंह तामाङले विद्युतीय बस संचालनका बारेमा धेरै हल्ला भए पनि काम केही नभएको बताए ।

प्रमुख कार्यकारी अधिकृत तामाङले मंगलबार स्थानीय विकास मन्त्री हितराज पाण्डेलाई महानगरपालिकाका काम कारवाही र योजनाहरु जानकारी गराउने क्रममा सुरुमा धेरै हल्ला गरिएपनि विद्युतीय बस संचालनका लागि महानगरपालिकालाई कहीँ कतैबाट केही नभनिएको र काम अगाडि नबढेको बताए ।

उनले विद्युतीय वस सञ्चालनका सम्बन्धमा बजेटको स्वीकृतिका लागि स्थानीय विकास मन्त्रालयमा प्रस्ताव पठाएपनि मन्त्रालयले प्रक्रिया नै अगाडि नबढाएको जानकारी दिए ।

केपी शर्मा ओलीले प्रधानमन्त्री भएलगत्तै काठमाडौ उपत्यकामा ६ महिनाभित्र विद्युतीय बस संचालनमा ल्याउने बताएका थिए । ओलीले जिम्मेवारी सम्हालेको एक महिनापछि गरेको ३६ बुँदे सम्बोधनमा उपत्यकामा विद्युतीय मेट्रो रेल सञ्चालनको काम अगाडि बढाउने विषयलाई समेत समावेश गरेका थिए ।

विद्युतीय बस र मेट्रो रेलको विषयलाई ओलीले प्राथमिकतामा राखेपछि महानगरपालिकाले ५ करोड रुपैयाँ बजेट विनियोजन गरेको थियो । तर, स्थानीय विकास मन्त्रालयले बजेट स्वीकृत नगरेको प्रमुख कार्यकारी अधिकृत तामाङले बताए ।