काठमाडौँ, कात्तिक । पेट्रोलियम पदार्थ तथा खाना पकाउने ग्यासको मूल्य तिहार र छठ पर्व सम्म मूल्यवृद्धि नहुने भएको छ । उपभोक्ताहरुको हितलाई मध्यनजर गर्दै उद्योग, वाणिज्य तथा आपूर्तिमन्त्री मात्रिकाप्रसाद यादवले चाडपर्वको अवसरमा पेट्रोलियम पदार्थको मूल्य नबढाउन नेपाल आयल निगमलाई निर्देशन दिएको छ । मुख्य रुपमा मनाइने चाडपर्वको अवसर पारेर  पेट्रोलियम पदार्थको मूल्य बढ्दा जनता तथा उपभोक्ताहरुको जीवनस्तर कष्टकर बन्ने भएकोले मन्त्री यादवले तिहार र छठसम्म इन्धनको मूल्य नबढाउन निर्देशन दिएको हो । उद्योग मन्त्रालयका सहसचिव नवराज ढकालका अनुसार निगमलाई पेट्रोलियम पदार्थको कारोबारमा जति नै घाटा भएपनि छठ पर्व सम्म मूल्यवृद्धि नगरी उपभोक्ताहरुको हितलाई मध्यनजर गरेर सुलभ दरमा पेट्रोलियम पदार्थ उपलब्ध गराउन आपूर्तिमन्त्रीले  निर्देशन दिएको उनले बताए । 

हाल निगमलाई पेट्रोल प्रतिलिटर रु. ११४ मा बिक्री भएतापनि प्रतिलिटर आठ रुपैयाँ ५० पैसा घाटा रहेको छ । त्यस्तै डिजेल रु. १०१ मा बिक्री गरेपनि नौ रुपैयाँ ३२ पैसा घाटा रहेको छ भने  खाना पकाउने ग्यासमा प्रतिसिलिण्डर रु एक हजार ४०० बिक्रीमा ४०४ रुपैयाँ ७३ पैसा घाटा रहेको निगमले जनाएको छ । सीमावर्ती भारतीय बजारमा नेपालको भन्दा पेट्रोलको मूल्य प्रतिलिटर २१ रुपैया ८७ पैसा र डिजेलमा २४ रुपैयाँ २८ पैसा बढी रहेको निगमले जनाएको छ । अन्र्तराष्ट्रिय बजारमा कच्चा तेलको मूल्य बढेकाले निगमले मूल्य समायोजन नगर्दा मासिक रु दुई अर्ब आठ करोड घाटा हुने निगमले जनाएको छ ।