विद्युत संसार साप्ताहिक
काठमाडौँ,  मंसिर । गत शनिबार देखि उपत्यकालाई धुवाँधुलो मुक्त बनाउन काठमाडौं महानगरपालिकाले ‘शहरी सौन्दर्यता प्रवद्र्धनमा सघाउ कार्यक्रम’को शुरुवात गरेको छ ।

उपत्यकाभित्र रहेका अव्यवस्थित केबुल, विद्युतका तार तथा पोलहरुको व्यवस्थापन गर्न कार्यक्रमको आयोजना गरेको हो । 

कार्यक्रमको उद्धघाटन गर्दै काठमाडौं महानगरपालिकाका मेयर विद्यासुन्दर शाक्यले उपत्यकालाई छिटै नै धुलोधुवाँबाट मुक्त गराई अव्यवस्थित रुपमा रहेको विभिन्न किसिमका केबुल तार ,विद्युतीय तार,टेलिफोन तथा नेटका तारहरुलाई भुमिगत गरी व्यवस्थित गराउने बताए । उनले भने यस भन्दा अघि विभिन्न सङ्घ–संस्थाले अलगअलग रूपमा सरसफाइ गर्दै आएपनि अब सामूहिक रुपमा काठमाडौँलाई सफा र सुन्दर राख्न सरसफाई कार्यक्रम गर्ने समेत बताए । 

त्यस्तै,कार्यक्रममा अब हरेक शनिबार महानगरले सरसफाइ कार्यक्रम सञ्चालन गर्ने महानगर वातावरण व्यवस्थापन विभागका प्रमुख हरिकुमार श्रेष्ठले  बताए । सडक सरसफाइसँगै महानगरपालिका क्षेत्रभित्र हरियाली प्रवद्र्धन गर्ने, अव्यवस्थित रुपमा रहेका केबुल, विद्युतका तार तथा पोलको व्यवस्थापन गर्ने, खानेपानीका पाइप व्यवस्थापन, सडकको ढल तथा सतही ढल व्यवस्थापनसमेत गर्ने भएको छ ।

रत्नपार्कबाट शुरु भएको ‘शहरी सौन्दर्यता प्रवद्र्धनमा सघाउ कार्यक्रम’ बागबजार, पुतलीसडक,डिल्लीबजार, मैतीदेवी हुँदै सिनामङ्गलसम्म पुगेर अन्त्य गरिएको थियो । कार्यक्रममा काठमाडाँै उपत्यका खानेपानी लिमिटेड, नेपाल दूरसञ्चार प्राधिकरण, मेलम्ची खानेपानी आयोजना, नेपाली सेना, नेपाल प्रहरी, ट्राफिक प्रहरी र सडक विभागका अधिकारीहरुको सहभागिता रहेको थियो ।