सफ्टवेयर प्रविधिको प्रयोग गरी ठगी गर्ने पेट्रोल पम्प कारवाहीमा

प्रकाशित मिति : Mon-26-Nov-2018
- Admin

काठमाडौँ, मङ्सिर । नेपाल गुणस्तर तथा नापतौल विभागले सफ्टवेयर प्रविधिको प्रयोग गरी ठगी गर्ने १२ पेट्रोल पम्पलाई कारवाही गरेको छ ।

गुणस्तर तथा नाप तौल विभागले पेट्रोलियम पदार्थमा उपभोक्तालाई ठगी गर्ने १२ वटा पेट्रोलपम्पलाई कारवाही गरेको हो ।

सफ्टवेयर प्रविधिको माध्यमबाट दुईदेखि पाँच प्रतिशतसम्म पेट्रोलियम पदार्थमा ठगी गर्ने १२ पेट्रोलपम्पहरुलाई कारवाहीको दायरामा ल्याइएको विभागले जनाएको छ ।

विभागका अनुसार पछिल्लो एक महिनाको अवधिमा ठगी गरी कारवाहीमा पर्ने पम्पहरुमा विजय आयल स्टोर कलैया बारा, ममता आयल स्टोर कलैया बारा, स्वस्थानी आयल स्टोर बरीयापुर बारा, अमित आयल स्टोर बारा, शङ्कर आयल स्टोर बारा, न्यू बगलामुखी आयल स्टोर स्वयम्भू काठमाडौँ, शङ्कर पेट्रोलियम रुपन्देही, रिया आयल सप्लायर्स कपिलवस्तु, खुश्बु फ्यूल सप्लायर्स ओखलढुङ्गा, हरिओम आयल स्टोर बारा, जयविकास आयल स्टोर बारा, लुम्बिनी लोटर्स आयल स्टोर रुपन्देही रहेका छन् ।

नेपाल गुणस्तर तथा नापतौल विभागका महानिर्देशक विश्वबाबु पुडासैनीका अनुसार सफ्टवेयर प्रविधिको माध्यमबाट व्यापक मात्रामा उपभोक्ता ठगी गर्ने पेट्रोलपम्पलाई कारवाही गरिएको बताएका छन् । उनले भने कारवाही गरिएका पेट्रोलपम्पलाई नगद रु ३० हजार, तीन वर्ष कैद र पेट्रोल पम्प शिलबन्दी गरिएको छ ।