काठमाण्डौं,साउन । नेपाल टेलिकमले ल्यान्डलाइन र पोष्टपेड मोवाइल सस्तिएको छ । टेलिकमले हाल सम्म उपलब्ध गराउँदै आईरहेको स्थानीय टेलिफोन अर्थात ल्याण्डलाइन फोन र पोष्टपेड मोवाइलको मूल्य सस्तो भएको हो ।

 यो परिमार्जित शुल्क १ श्रावण २०७६ देखि नै लागू भएको टेलिकमले जनाएको छ । आर्थिक विधेयक, २०७६ को दफा १४(१) मा व्यवस्था भए बमोजिम टेलिफोन जडान गर्ने ग्राहकबाट स्वामित्व शुल्क वापत ५ सय रुपैंया मात्र लिने व्यवस्था भएपछि नेपाल टेलिकमले उपलब्ध गराउँदै आएको स्थानीय टेलिफोन तथा पोष्टपेड मोबाइल पहिले भन्दा कम दरमा उपलब्ध हुने भएको छ ।

 

यस निणर्य पश्चात अब १ हजार ६ सय ३५ रुपैयाँमा स्थानीय टेलिफोन र ९ सय ४५ रुपैयाँमा पोष्टपेड मोबाइल लिन सकिने छ । यसअघि स्थानीय टेलिफोनका लागि २ हजार २ सय र पोष्टपेड मोबाइलका लागि १ हजार ५ सय १० रुपैयाँ बुझाउनु व्यवस्था थियो । साथै उक्त विधेयकको कार्यान्वयनसँगै स्थानीय टेलिफोनको नामसारी गर्दा लाग्ने शुल्कमा समेत ५ सय ६५ रुपैयाँ कम भएको छ । यसअघि टेलिफोन नामसारी गर्दा १२ सय ४३ रुपैयाँ शुल्क बुझाउनु पर्दथ्यो भने अहिले जम्मा ६ सय ७८ रुपैयाँ मात्र भुक्तानी गर्नु पर्ने टेलिकमले जानकारी दिएको छ ।