खोटाङ, साउन । दिक्तेल रुपाकोट मझुवागढी नगरपालिकाको १५ वटै वडामा सडक सौर्यबत्ती जडान गर्न शुरु गरिएको छ । नगरपालिकाको ‘उज्यालो नगर अभियान’ अन्तर्गत रु एक करोड २३ लाख लागतमा १५० वटा सडक सौर्यबत्ती खरीद गरेर १५ वटै वडामा जडान गर्न शुरु गरिएको हो ।

रातको समयमा नगरभित्र आवतजावत गर्ने यात्रुलाई सहजता, अँध्यारोका कारण हुने सवारी दुर्घटना तथा आपराधिक क्रियाकलाप न्यूनीकरण गर्न सडक सौर्यबत्ती जडान गर्न शुरु गरिएको नगरप्रमुख दीपनारायण रिजाललले बताए । 

राति आफैँ बल्ने र दिउँसो आफैँ बन्द हुने सडक सौर्यबत्ती पहिलो चरणमा व्यापारिक केन्द्र, बैंक तथा वित्तीय संस्थाको कार्यालय अगाडि र बाक्लो मानवबस्ती रहेको ठाउँमा जडान गरिने उनको भनाई रहेको थियो । जिल्लाको प्रमुख व्यापारिक केन्द्रसमेत रहेको दिक्तेल रुपाकोट मझुवागढी नगरपालिकालाई सुरक्षित र सभ्य नगर बनाउने अभियान अन्तर्गत सडक सौर्यबत्ती जडान गर्न शुरु गरिएको हो । 

पहिलो चरणमा वडा नम्बर–१ दिक्तेलमा ५७, वडा नम्बर–२ सोल्मामा ५, वडा नम्बर–३ बाम्राङमा ५, वडा नम्बर–४ खाल्लेमा ४, वडा नम्बर–५ लफ्याङमा ४, वडा नम्बर–६ नेर्पामा ४, वडा नम्बर–७ दोर्पाचिउरीडाँडामा ४ वडा जडान गरिनेछ । यस्तै, वडा नम्बर–८ दोर्पाबुवालुङमा ७, वडा नम्बर–९ निर्मलीडाँडामा ४, वडा नम्बर–१० पाथेकामा ६, वडा नम्बर–११ खार्मीमा ५, वडा नम्बर–१२ जालपामा ६, वडा नम्बर–१३ नुनथलामा १५, वडा नम्बर–१४ बुइपामा १५ र वडा नम्बर–१५ विजयखर्कमा नौ वटा सडक सौर्यबत्ती जडान गरिने नगरप्रमुख रिजालले बताए । 

 

एक ठाउँमा रु ७८ हजार बराबरको लागतमा जडान सम्पन्न हुने सडक सौर्यबत्तीको सोलार प्यानेल २०० वाट क्षमताको रहेको जनाइएको छ । बाह्र भोल्टको ब्याट्रीसहित फलामे पोलमा जडान गरिने सडक सौर्यबत्तीको बल्व ४० वाट क्षमताको रहेको ठेकेदार कम्पनी विराट इनर्जी प्रालि ललितपुरका प्रतिनिधि धनकुमार राईले बताए । नगरपालिकामा जनप्रतिनिधि निर्वाचित भएर आउनुभन्दा अगाडि नगरक्षेत्रभित्रको ३१ ठाउँमा सडक सौर्यबत्ती जडान गरिएको थियो । सो समयमा अपुग भएका ठाउँमा यस पटक थप १५० वटा खरिद गरेर जडान शुरु गरिएको नगरपालिकाले जनाएको छ ।