काठमाण्डौ, साउन ।  संखुवासभामा ३ मेगावाट क्षमताको पिलुवा खोला जलविद्युत केन्द्र सञ्चालन गरेको अरुण भ्याली हाइड्रोपावर डेभलपमेन्ट कम्पनीले नाफा कमाउन सफल भएको छ । कम्पनीले ५ करोड ३२ लाख ८७ हजार रुपैयाँ खुद नाफा कमाएको छ कम्पनीले गत वर्षको चौथो त्रैमाससम्मको अवधिमा यो मुनाफा आर्जन गरेको हो । 

अघिल्लो वर्षको यही अवधिको तुलनामा ३ करोड १९ लाख २३ हजार रुपैयाँले बढी  नाफा भएको कम्पनीले जनाएको छ । कम्पनीले अघिल्लो वर्ष २ करोड १३ लाख ६४ हजार रुपैयाँ खुद नाफा आर्जन गरेको थियो । कम्पनीको चौथो त्रैमासको वित्तीय विवरण अनुसार विद्युत बिक्रीबाट ५ करोड ४७ लाख ७३ हजार रुपैयाँ आम्दानी भएको छ । यो अघिल्लो वर्षको तुलनामा करिब २७ लाख १३ हजार रुपैयाँले बढी हो । अन्य शिर्षकबाट पनि कम्पनीले ४ करोड २२ लाख ५९ हजार रुपैयाँ आम्दानी गरेको छ । अन्य शिर्षकको अघिल्लो वर्षको आम्दानी १ करोड ८९ लाख ९१ हजार थियो ।