सबै जिल्ला संघलाई महासंघले समेट्नु पर्छ

प्रकाशित मिति : Wed-14-Aug-2019
- राजु भण्डारी अध्यक्ष, पोखरा इलेक्ट्रिकल एशोशिएसन

विद्युतीय व्यवसायीहरुको हकहितका लागि स्थापना भएको नेपाल विद्युतीय व्यावसायी महासंघमा देशभरका २१ वटा जिल्ला संघहरु आवद्ध छन् । विद्युतीय व्यवसायीहरुको हक अधिकारका लागि महासंघले सम्बन्धित सरकारी निकाय सँग पहल गर्दै आएको छ ।

गुणस्तरीय सामग्रीको बिक्रि वितरणका लागि प्रोत्साहन, व्यवसायीहरुको क्षमता तथा नेतृत्व विकासका लागि तालिम दिने जस्ता कार्य महासंघले गर्दै आएको छ । विद्युतीय सामग्रीहरुमा गुणस्तरी चिन्ह् कायम गर्नका लागि महासंघले गर्दै आएको पहल, भन्सारमा हुने अनियमितताका विषयमा उठाउँदै आएको आवाज लगायतका काम प्रशंसनिय छन् । देशभरका विद्युतीय व्यवसायीहरुलाई एक गराउनका लागि महासंघले आफ्नो क्षेत्रबाट पहल गर्दै आएको छ । यद्यपि महासंघ काठमाण्डौ उपत्यकामा मात्र केन्द्रित भएको हो कि भन्ने भान जिल्ला संघलाई पर्दै गएको छ । तसर्थ महासंघमा आवद्ध सम्पूर्ण जिल्ला संघहरुलाई समेट्दै अघि बढ्नु पर्दछ । त्यस्तै जिल्ला संघमा के कस्ता समस्याहरु रहेका छन् त्यसको पहिचान गरी समस्या समाधानका लागि समेत आवश्यक पहल गर्नु पर्दछ । त्यस्तै जिल्ला संघको विस्तारका लागि पनि महासंघले कार्य गर्नु पर्ने देखिन्छ भने जुन जिल्ला संघ आर्थिक रुपमा कमजोर रहेका छन् ति संघलाई आवश्यक सहयोग गर्नु पर्दछ । त्यस्तै समय सापेक्ष व्यवसायीहरुको हक अधिकारका लागि महासंघ अघि बढ्नु पर्दछ ।