यौन र्दुव्यवहारको आरोप लागेपछि सभामुख महराले दिए राजीनामा

प्रकाशित मिति : Tue-01-Oct-2019
- Admin

काठमाण्डौ, असोज । यौन र्दुव्यवहारको आरोप लागेपछि सभामुख कृष्णबहादुर महराले राजीनामा दिएका छन् । सभामुख महरामाथि संसद सचिवालयमा कार्यरत एक महिलाले यौन र्दुव्यवहार गरेको आरोप लगाएपछि उनले आफ्नो पदबाट राजीनामा दिएका हुन् ।

सचिवालयमा कार्यरत ती महिला कर्मचारीले आइतबार राति आफ्नै निवासमा आएर सभामुख महराले आफूमाथि यौन र्दुव्यवहार गरेको आरोप लगाएकी थिइन् ।

आफूलाई र्दुव्यवहार गरेको घटनाबारे प्रहरीलाई जानकारी गराएपछि सभामुख महरा निवासबाट बाहिरिएको उनको भनाइ थियो ।

त्यसकै आधारमा सोमबार साँझ अनलाइनहरूमा समाचार आएपछि सभामुख महराका प्रेस सल्लाहकार डिल्ली मल्लले राति विज्ञप्ति जारी गरी खण्डन समेत गरेका थिए ।

यौन दुर्व्यवहार भोगेको बताउने महिलाले आफूलाई महराले कुटपिटसमेत गरेको आरोप लगाउँदै आफ्नो तीनकुनेस्थित भाडाको फ्ल्याटमा महराको चस्माको टुक्रा, जुत्ताको भाग आदि छुटेको दाबी गरेकी छन् । यसबाहेक सभामुखसँग त्यहाँ आउनुअघि र पछि पनि फोन र भाइबरमार्फत कुराकानी भएको उनको भनाइ छ ।

प्राविधिक छानबिनबाट यसको सत्यता बुझ्न गाह्रो हुन्न  तर प्रहरीले उजुरी नआएको बताउँदै यसबारे औपचारिक अनुसन्धान गरेको छैन ।

मंगलबार बिहान प्रधानमन्त्री निवास बालुवाटारमा आकस्मिक रुपमा बसेको नेकपाको सचिवालय बैठकले सभामुख कृष्णबहादुर महरालाई सभामुख र सांसदबाट राजिनामा गर्न सुझाव दिने निर्णय गरेको थियो । सोहि निर्णय पश्चात सभामुख महारले राजीनामा दिएका हुन् ।