नागढुङ्गा सुरुङमार्गको आज शिलान्यास हुने भएको छ । सुरुङमार्ग निर्माण परियोजनाका अनुसार नागढुङ्गाको टोटेपाखामा आज दिउँसो साढे दुई बजे एक कार्यक्रमका बीच प्रधानमन्त्री केपी शर्मा ओलीले सुरुङमार्गको शिलान्यास गर्नुहुनेछ । जापान सरकारको ऋण सहायतामा बन्न लागेको सुरुङमार्गका लागि गत असोज ६ गते नागढुङ्गा सुरुङमार्ग निर्माण परियोजना र जापानको ‘हाज्मा अन्डो कर्पोरेसन’ बीच ठेक्का सम्झौता भएको थियो ।

 

सम्झौताअनुसार साढे तीन वर्षभित्र निर्माण सम्पन्न भइसक्नेछ । निर्माण कार्य सुरु हुन भने अझै दुई महिना लाग्ने नागढुङ्गा–नौबिसे सुरूङमार्ग आयोजनाका प्रमुख श्यामप्रसाद खरेलले सीआईएनसँग  बताए । १३ अर्ब ५० करोडमा ठेक्का सम्झौता भएको सुरुङ मार्गको लम्बाइ दुई दशमलव ६७ किलोमिटर रहेको छ । ४० वर्षभित्र तिर्नेगरी शून्य दशमलव शून्य एक प्रतिशत ब्याजदरमा जापानले ऋण सहायता नेपाललाई उपलब्ध गराएको हो ।

 

यसैबीच सरकारले काठमाडौँका विभिन्न महत्वपूर्ण सडक तथा पुलको निर्माण र स्तरोन्नतिमा ढिलाइ गर्ने निर्माण कम्पनीलाई स्पष्टीकरण सोधेको छ । स्पष्टीकरण चित्त बुझ्दो नभए उनीहरुलाई कालो सूचीमा राख्न सिफारिस गरिने सडक विभाग अन्तर्गतको सडक डिभिजन कार्यालय काठमाडौँले जनाएको छ ।

 

एकैपटक विभिन्न १६ आयोजनामा ढिलाइ गर्ने १५ ठेकेदारसँग स्पष्टीकरण सोधिएको डिभिजन प्रमुख कैलाशकुमार श्रेष्ठले बताए । विभागले यी कम्पनीलाई पटक–पटक समयमै काम गर्न निर्दशन दिँदै आएको थियो । साभार : रेडियो मनास्लु