चिलिमे आयोजनाले लाभांश वितरण गर्दै, शेयरधनीले २५ प्रतिशत पाउने

प्रकाशित मिति : Tue-05-Nov-2019
- Admin

काठमाण्डौ, कात्तिक । चिलिमे जलविद्युत कम्पनीले आफ्ना सेयरधनीलाई लाभांश वितरण गर्ने भएको छ । कम्पनीले आर्थिक वर्ष २०७५र७६ मा आर्जन गरेको मुनाफाबाट शेयरधनीलाई २५ प्रतिशत लाभांश (१ अर्ब १८ करोड ९५ लाख ३३ हजार ९ सय ४५ रुपैयाँ ) वितरण गर्ने भएको हो ।

कम्पनी सञ्चालक समितिको सोमबार बसेको बैठकले ५ प्रतिशत नगद लाभांस र २० प्रतिशत बोनस सेयर दिने निर्णय गरेको छ । चुक्ता पुँजी ४ अर्ब ७५ करोड ८१ लाख ३५ हजार ७ सय ८२ रुपैयाँ रहेको कम्पनीले ९५ करोड १६ लाख २७ हजार १ सय ५६ रुपैयाँ बराबरको बोनस सेयर र २३ करोड ७९ लाख ६ हजार ७ सय ८९ रुपैयाँ बराबरको नगद सेयरधनी सदस्यलाई वितरण गर्ने भएको छ ।

रसुवामा सञ्चालित २२ मेगावाटको चिलिमे जलविद्युत केन्द्रको विद्युत बिक्रीबाट भएको आम्दानीबाट कम्पनीले शेयरधनीलाई लाभंश दिँदै आएको छ । कम्पनीको आगामी मंसिर ११ गते २३औं वार्षिक साधारणसभा हुने भएको छ ।