काठमाडौं,माघ । निजी विद्युत उत्पादकहरूको छाता संस्था, ‘स्वतन्त्र ऊर्जा उत्पादकहरूको संस्था नेपाल (इपान) १९ औं वर्षमा प्रवेश गरेको छ । इपानले यसै वर्षमात्र स्थापना गरेको ‘नेपाल ऊर्जा ज्योति सम्मान’ २०७६ पूर्वजलस्रोत मन्त्री स्व. शैलजा आचार्यलाई प्रदान गरेको छ । स्व.आचार्यकै पहलमा  विद्युत ऐन, २०४९ जारी गरी निजी क्षेत्रलालाई जलविद्युत विकासमा प्रवेश गराउन उल्लेख्य भूमिका निर्वाह गरेको भन्दै आचार्यलाई उक्त सम्मान दिइएको इपानले जनाएको छ ।

 

कार्यक्रममा इपानले शैलजा आचार्य आदर्श समाजलाई रु. एक लाख रुपैंया सहित सम्मानपत्र प्रदान गरेको छ । यस समाजले देशभर भ्रष्टाचार विरोधी जनचेतना तथा जागरणका काम गर्दै आएको छ । इपानले राजनीतिक नेतृत्व, जलविद्युत प्रवर्द्धक, सामाजिक विकास अभियन्ता तथा पत्रकारलाई यस क्षेत्रमा पुर्याएको योगदानका आधारमा इपानले स्थापना गरेको ‘इपान कोष’ बाट हरेक वर्ष यस्तो पुरस्कार प्रदान गर्ने निर्णय गरेको इपानले जनाएको छ ।

 कार्यक्रममा इपान अध्यक्ष शैलेन्द्र गुरागाईंले देशमा केहि समय पहिले सम्म रहेको  लोडसेडिङ्गलाई हटाउन इपानको पनि ठूलो योगदान रहेको बताउँदै सरकारले निजी क्षेत्रबाट राखेको अपेक्षा भन्दा बढी काम गरेको बताए । उनले भने, निजी क्षेत्रले अहोरात्र काम गरेर आनो जिम्मेवारी पूरा गरेका छौ , ‘आनो कामलाई निरन्तर रुपमा अघि बढाउँदै निजी क्षेत्रको हितका लागि सरकारलाई दबाब पनि दिइरहने छौं ।’ सरकारले निजी क्षेत्रलाई विद्युत उत्पादनमा सहभागी गराए पनि निजी क्षेत्रलाई उपेक्षा गरेको उनले गुनासो गरे ।

 त्यस्तै रुग्ण जलविद्युत आयोजनाका प्रवर्द्धकहरूले सरकारले यसभन्दा पहिले निजी क्षेत्रलाई दिने भनिएको सेवा, सुविधा र सहुलियत उपलब्ध गराउन सरकार जिम्मेवार हुन नसकेको आरोप लगाएका छन् ।

 

 

दुई सय मेगावाट विद्युत उत्पादन गर्ने ३२ प्रवर्द्धक सम्मानित

इपानले आफ्नो १८औं वार्षिक साधारणसभाको उपलक्ष्यमा ३२ जलविद्युत प्रवर्द्धकलाई सम्मान गरेको छ । झन्डै २ सय मेगावाट विद्युत उत्पादन गरेर राज्यलाई योगदान पुर्याएको र निजी क्षेत्रको बलियो उपस्थिति जनाएको भन्दै शुक्रबार इपानले सम्मान गरेको हो ।  

सम्मानित हुनेमा मकवानपुर जिल्लामा रहेको २२ मेगावाटको माण्डु हाइड्रोपावर, २३ किलोवाटको सिउरी भूमे लघुजलविद्युत, २५ मेगावाटको काबेली बी–१ , १३.६ मेगावाटको थापा खोला, कास्कीमा बनेको मद्क्यू खोला, लमजुङ र कास्कीको सीमा रुदी खोलामा निर्माण भएको १५.४ मेगावाटको रुदी ए र बी पाँचथरको हेवाखोलामा बनेको २२.१ मेगावाटको तल्लो हेवा खोला, बागमतीमा बनेको २२ मेगावाटको बागमती ,ताप्लेजुङ तथा पाँचथरमा निर्माण भएको काबेली बी–१ लगायत ३२ वटा जलविद्युत कम्पनीका प्रवद्र्धकहरु सम्मानित भएको छ ।

सम्मानित हुनेमा झन्डै आधा आयोजना अति रुग्ण अवस्थामा छन् । त्यसैंले इपानको आगामी नेतृत्व रुग्ण आयोजनालाई माथि उठाउने, सरकारले घोषणा गरेका सेवा सुविधा उपलब्ध गराउन लबिङ गर्ने तथा समग्र निजी क्षेत्रको हितमा काम गर्ने अठोट लिएर आउनुपर्नेमा जोड दिएका छन् ।