झिमरुक र आँधीखोलाको महसुल काउन्टर सोमबारदेखि खुल्ने

प्रकाशित मिति : आईत, बैशाख २८, २०७७
- विद्युत संसार संवाददाता

विद्युत संसार, बैशाख, काठमाडौं । बुटवल पावर कम्पनी (बिपिसी) ले सोमबारदेखि झिमरुक र आँधीखोला जलविद्युत केन्द्रको विद्युत महसुल संकलन काउन्टर खुलाउने भएको छ । बिपिसीको व्यवस्थापनले देशभर लकडाउन सुरु भएपछि चैत ११ गतेदेखि बन्द महसुल काउन्टर खुलाउने निर्णय गरेको हो ।

नेपाल विद्युत प्राधिकरणले मिटर रिडिङ तथा महसुल संकलन कार्य सुरु गरेकाले पाल्पा, स्याङ्जा, प्युठान र अर्घखाँची जिल्लाका महसुल काउन्टर खोल्न लागिएको बिपिसीका उत्पादन विभाग प्रमुख प्रकाश श्रेष्ठले बताए । उनका अनुसार बिपिसीको फागुनदेखिको विद्युत महसुल उठ्न बाँकी छ ।

बिपिसीले झिमरुक र आँधीखोलाको विद्युत वितरणबाट मासिक करिब ५ करोड रुपैयाँ बराबरको आम्दानी गर्दै आएको छ । कोरोना भाइरस ९कोभिड–१९० को महामारीले साना उद्योग, व्यापारिक केन्द्र तथा कार्यालयको काम बन्द हुँदा लकडाउनपछि ग्राहकबाट उठ्ने रकम घट्ने देखिएको श्रेष्ठले बताए ।

महसुल उठ्न नसके पनि विद्युत उत्पादन तथा वितरणमा कुनै समस्या नरहेको बिपिसीले जनाएको छ । ४ जिल्लामा बिपिसीका ५२ हजार बढी ग्राहक छन् । झिमरुकका मात्रै २० हजार ग्राहक छन् । आँधीखोलाले ३२ हजार बढी ग्राहकलाई विद्युत सेवा दिँदै आएको छ ।

बिपिसीले विद्युत महसुलको बिलिङ तथा महसुल संकलन गर्न ‘बिलिङ सर्भिस म्यान’ नियुक्त गरेको छ । यीनै बिलिङ सर्भिस म्यानले मिटर रिडिङ, बिलिङ तथा महसुल संकलन गरेर हरेक महिनाको १५ गते काउन्टरमा बुझाउने प्रभावधान छ । झिमरुकमा ३२ र आँधीखोलामा ८० जना बिलिङ सर्भिस म्यान कार्यरत छन् ।ऊर्जा खबर