भारतमा निर्माण भएको निम जि–ईलेक्ट्रिक अटो नेपाली बजारमा

प्रकाशित मिति : सोम, मंसिर २९, २०७७
- विद्युत संसार संवाददाता

काठमाडौं, मंसिर । नेपालको एक प्रतिष्ठित व्यावसायिक संस्था हिमालय अर्गनाइजेशन अन्तर्गत हिमालय मोटोराड कम्पनीले भारतमा उत्पादन तथा निर्माण भएको निम जि–ईलेक्ट्रिक अटो नेपाली बजारमा ल्याएको छ ।

यस अटोलाई एक पटकको फूलचार्जबाट १३० किमि गुड्ने केरेला अटोमोवाइल्स लिमिटेडद्वारा भारतमा निर्मित निम जि, ईलेक्ट्रिक अटो नेपाली बजारमा ल्याएको हो ।

नेपालमा हाल डिजेल पेट्रोलबाट चल्ने सवारी साधनहरु विस्थापित गर्नका लागि साना तथा ठुला ईलेक्ट्रिक सवारी साधनहरु भित्रिने क्रम तीव्र रुपमा बढिरहेको छ ।

डिजेल पेट्रोलबाट चल्ने सवारी साधनहरुको तुलनामा ईलेक्ट्रिक सवारी साधनहरु केही महंगो हुने भएतापनि समग्रमा सञ्चालन खर्च धेरै नै सस्तो पर्न जाने कम्पनीले जनाएको छ । अहिले नेपालका यातायात व्यवसायीहरु इलेक्ट्रीक सवारी साधनमा आकर्षित हुन थालेका छन् । यसै क्रममा हिमालय मोटोराडले भारतको केराला राज्य सरकारको स्वामित्वमा रहेको केरला अटोमोवाईल लिमिटेडद्धारा उत्पादित निम जि, ईलेक्ट्रिक अटोको नेपाल अधिराज्यभर आइतबारदेखि बिक्री वितरणको शुभारम्भ गरेको छ ।

यस ईलेक्ट्रिक अटोको संचालन खर्च ७५ पैसा प्रति किलोमिटर मात्र रहेको, ब्याट्रीमा ३ वर्ष वा १५०० लाईफ साईकलको वारेन्टी रहेको छ । यो अटोलाई ३ घण्टा ५५ मिनेटमै सजिलै आफ्नै घरको प्लगमा जोडेर फुल चार्ज गर्न सकिने हिमालय मोटराडका अध्यक्ष ध्रुव थापाले बताए । कार्यक्रममा केरेला अटोमोवाइल्स कम्पनीका प्रतिनिधी फिरोज खानले सो कम्पनी र सवारी साधनहरुको बारेमा जानकारी गराएका थिए । उनले निकट भविष्यमा उक्त इलेक्ट्रिक अटोको व्याट्रीमा ८ वर्ष सम्मको वारेन्टी दिनको लागि कम्पनीले काम गरिरहेको बताए ।

त्यस्तै कार्यक्रममा हिमालय मोटोराडका निर्देशक सौरव थापाले उक्त सवारी साधनमा ३० डिग्री सम्मको उकालो सजिलै चढ्न सक्ने नेपालको बाटो सुहाउँदो, उच्चत्तम गति ५० कि.मि.प्रतिघण्टा, आकर्षक बनावटका साथै डिजिटल डिस्प्ले मिटर समेत रहेको जानकारी दिए । कम्पनीका अनुसार निम जि, ईलेक्ट्रिक अटोको शुभारम्भ मूल्य रू. ८,४९,००० रहेको छ ।