महिनादिन भित्रै चन्द्रागिरी नगरपालिकाले ५०० सडकबत्ती जडान गर्दै

प्रकाशित मिति : मंगल, पौष १४, २०७७
- विद्युत संसार संवाददाता

काठमाडौं, पुस । चन्द्रागिरि नगरपालिकाले काठमाडौंं उपत्यकाको मुख्य सडकमा ५०० सडक बत्ती जडान गर्ने भएको छ ।

काठमाडौंको पिप्लामोड,नागढुङ्गा,सतुङ्गल हुँदै कलङ्की क्षेत्रको सडकमा नगरपालिकाले करिब १ करोड लागतमा ५०० सडक बत्ती जडान गर्ने भएको हो ।

नगरपालिकाले सडक क्षेत्रमा हुने अपराधिक क्रियाकलापलाई रोक्नका लागि ५०० सडकबत्ती जडान गर्न लागेको नगरपालिकाका प्रमुख घनश्याम गिरी बताए । सडक बत्ती जडान गर्नका लागि नगरपालिकाले १ करोड रुपैयाँ विनियोजन गरेको बताउँदै आगामी एक महिनाभित्र सडक बत्ती जडानको काम सक्ने प्रमुख गिरीको भनाई छ ।

उनले भने “चन्द्रागिरिले गत महिना राजमार्ग क्षेत्रमा ६८ सिसी क्यामरा जडान गरेको छ, उक्त क्यामेरा पनि चन्द्रागिरिले १ करोड रुपैयाँ लागतमा जडान गरेको हो । सिसी क्यामरा र सडक बत्ती जडानसँगै चन्द्रागिरिको राजमार्गमा हुने आपराधिक क्रियाकलाप कम हुँदै जाने विश्वास नगरपालिकाले लिएको छ ।

नगरपालिकाको विकासलाई उच्च प्राथमिकता दिएको सो नगरपालिकाले नगरपालिकाको भवन निर्माणसमेत अन्तिम चरणमा पुर्याएको छ । यस्तै जापानी अन्तर्राष्ट्रिय सहयोग नियोग (जाइका)को सहयोगमा नेपालकै पहिलो सुरुङमार्ग नागढुङ्गा–सिस्नेखोला सुरुङमार्ग चन्द्रागिरिमा निर्माण हुँदैछ ।