विद्युत माग पूरा गर्न सवस्टेशन निर्माणमा जोड

प्रकाशित मिति : Sun-05-Jan-2020
- Admin

परासी, पुस । नेपाल विद्युत प्राधिकरणका कार्यकारी निर्देशक कुलमान घिसिङले औद्योगिक क्षेत्रको विद्युत माग पूरा गर्न सवस्टेशन निर्माण गर्ने बताएका छन् । पश्चिम नवलपरासी स्थित नेपाल विद्युत प्राधिकरण परासी वितरण केन्द्रको नवनिर्मित भवनको शनिबार उद्घाटन गर्दै उनले यस्तो बताएका हुन् ।

उनले परासी–भैरहवा औद्योगिक क्षेत्रमा सवस्टेशन बनाउन लागिएको बताए । पश्चिम नवलपरासीको हकुईमा सवस्टेशन बन्ने जानकारी दिँदै कार्यकारी निर्देशक घिसिङले भने “परासी–भैरहवा क्षेत्र औद्योगिक क्षेत्रको रूपमा विकास भइरहँदा विद्युतको माग बढिरहेको छ, उद्योगलाई विद्युत माग पूरा गर्न हामीले नवलपरासीकै हकुईमा १३२ केभीएको सवस्टेशन बनाउँदैछौँ, त्यहाँबाट उद्योगलाई पर्याप्त विद्युत आपूर्ति हुन्छ ।”

उद्योगीले उक्त क्षेत्रमा लामो समयदेखि सवस्टेशन बनाउन माग गर्दै आएका थिए । नवलपरासीकै सुनवलमा पनि न्यू बुटवल–गोरखपुर प्रसारण लाइन अन्तर्गत ४०० केभीएको सवस्टेशन बन्ने प्रक्रियामा छ ।

केन्द्र प्रमुख विजय महतोले परासी वितरण केन्द्रको भवन रु ९० लाख निर्माण भएको बताए । कार्यकारी निर्देशक घिसिङले शनिबार नै नवलपरासीमा निर्माण हुनलागेको न्यू बुटवल सवस्टेशन, भरतपुर–बर्दघाट ट्रान्समिसन लाइन र होङ्सी सिमेन्ट ट्रान्समिसन लाइनको पनि निरीक्षण गरेका थिए ।