तनहुँ जिल्लालाई पूर्ण विद्युतीकरण गरिँदै

प्रकाशित मिति : Tue-14-Jan-2020
- Admin

तनहुँ, पुस । विद्युत प्राधिकरण कार्यालय तनहुँले जिल्लालाई पूर्ण विद्युतीकरण गर्ने भएको छ । प्राधिकरणले आर्थिक वर्ष २०७६÷७७ असार मसान्त भित्र तनहुँ जिल्लामा पूर्ण विद्युतीकरण गर्ने भएको हो ।

सबै क्षेत्रमा विद्युत पुर्याउने लक्ष्यका साथ विद्युत लाइन छुट भएका स्थानमा आपूर्ति गर्नका लागि बोलपत्र आह्वान गरी प्रक्रिया अघि बढाइएको प्र्राधिकरण कार्यालयका इञ्जिनीयर रामबाबु चौधरीले बताए । नगरपालिका र गाउँपालिका मा रहेका काठको पोल हटाएर स्टिल पोल राख्ने र नाङ्गो तार हटाएर कालो तारको व्यवस्था गरिने, त्यस्तै पोल राखिँदै क्षमता वृद्धि गर्ने, नयाँ ट्रान्सफर थप गर्ने उनले बताए ।

जिल्लाको भानु नगरपालिका–६, ७, ८ र ९ का बासिन्दालाई सामुदायिक ग्रामीण विद्युतीकरण सेवा सिसाघाट र वडा नं १०, १२, १३ मा लमजुङ स्थित सूर्यपाल सामुदायिक विद्युत उपभोक्ता समितिले विद्युत वितरणको व्यवस्था गरेको छ भने बाँकी अन्य वडामा विद्युत प्राधिकरणले नै काम गर्दै आएको छ ।

दमौली बजार क्षेत्रमा सिटिफिडर कायम गर्न लागिएको उनले बताए । दमौली हुँदै जिल्लाको केशवटार र रिसिङसम्म एउटै लाइन हुँदा समय समयमा लाइन जाने समस्या रहेकाले एक महिना भित्रमा पूर्णरूपमा लाइन जाने समस्या हट्ने इञ्जिनीयर चौधरीले बताए ।