तार भूमिगत बनाउन प्राधिकरण र सडक विभाग बीच समझदारी

प्रकाशित मिति : Wed-12-Feb-2020
- Admin

काठमाडौं, माघ । विद्युतीय तारलाई भूमिगत बनाउनका लागि नेपाल विद्युत प्राधिकरण र सडक विभाग बीच सहमति भएको छ । तार भूमिगत गर्न प्राधिकरणले सडक प्रयोग र त्यसलाई पुनस्थापनाबारे विभागका महानिर्देशक केवशकुमार शर्मा र प्राधिकरणका कार्यकारी निर्देशक कुलमान घिसिङबीच बिहीबार समझदारी भएको हो ।

प्राधिकरणले करिब ४ सय किलोमिटर सडकमा काम गर्न अनुमति मागेको विभागका महानिर्देशक शर्माले जानमकारी दिए । प्राधिकरणलाई एकैपटक सबैतिर सडक प्रगोग गर्न अनुमति नदिइएको उनले बताए । उनका अनुसार पहिले ५,७ किलोमिटरमा काम हेर्ने, खाल्डा पारिने स्थानमा धुलो उडाउन नदिन रबर म्याटले छोप्नपर्ने, व्यवस्थित ढंगले काम गर्नुपर्ने र १० दिनभित्र सडकलाई पुन पुरानै अवस्थामा फर्काउनुपर्ने गरी समझदारी भएको बताए ।

पहिलो खण्डमा समझदारी अनुसार नै काम गरे क्रमशः तार भूमिगत गर्न अरु खण्डहरु पनि दिँदै जानेउनले बताए । प्राधिकरणले यो सहमतिपछि काठमाडौंमा पहिलोपटक तारलाई भूमिगत गर्ने कामको थालनी गर्ने भएको छ । यसका लागि लागि भारतीय कम्पनी केईआई इन्ड्रष्ट्रिज लिमिटेडसँग ठेक्का सम्झौता भइसकेको छ । ठेकेदार कम्पनीले भूमिगत वितरण प्रणालीको डिजाइन, समान आपूर्ति, जडान र सञ्चालन गर्ने छ । ३२ महिनाभित्र पहिलो चरणमा काठमाण्डौको महाराजगञ्ज र रत्नपार्क वितरण केन्द्र अन्तरगत तार भूमिगत गरिसक्ने योजना छ । यसका लागि निर्माण मेसिन, उपकरण र सरसामान आईसकेको छ । प्राधिकरणका कार्यकारी निर्देशक कुलमान घिसिङले सुरुआतमा महाराजगञ्ज क्षेत्र र सिहंदरबारबाट धोबीखोला जाने फिडरको लाइन भूमिगत गर्न तायरी भइरहेको छ बताए ।