आपूर्ति मन्त्रालयको आग्रह : आवश्यकता भन्दा बढी ग्यास नथुपार्न

प्रकाशित मिति : Fri-13-Mar-2020
- Admin

काठमाण्डौ , फागुन । सरकारले आफ्नो आवश्यकता भन्दा बढी खाना पकाउने एलपी ग्यास थुपारेर नराख्न उपभोक्तालाई आग्रह गरेको छ ।

उद्योग, वाणिज्य तथा आपूर्ति मन्त्रालयले आज विज्ञप्ति निकालेर बजारमा ग्यासको खपत नियमित भन्दा धेरै देखिएकोले ग्यास थुपारेर नराख्न उपभोक्तालाई आग्रह गरेको हो ।

मन्त्रालयका सहायक प्रवक्ता उर्मिला केसीले विज्ञप्ति निकालेर बजारमा ग्यासको आपूर्ति पर्याप्त भएकोले माग धान्न समस्या नरहेको बताएको हो । उनले भने बजारमा आपूर्ति सहज गर्न यो महिना नियमित आपूर्तिभन्दा ११ हजार मेट्रिक टन बढी ग्यास आयातको प्रक्रिया सुरु गरिएकोे छ ।

मन्त्रालयले उपभोक्ताहरुलाई दैनिक उपभोग्य वस्तुहरुको अभाव हुन नदिन र मूल्यवृद्धि नियन्त्रण गर्न अनुगमनलाई प्रभावकारी रुपमा अगाडि बढाएको जनाएको छ । उपभोक्ताहरुलाई विगतमा झैँ नियमित तरिकाले वस्तुहरु उपभोग गर्न तर अनावश्यक मौज्दात नराख्न आग्रह गरिएको मन्त्रालयकी सहायक प्रवक्ता केसीको भनाइ छ ।