रुकुमपूर्व, चैत ।  पाँच मेगावाट क्षमताको रुकुमगाड जलविद्युत आयोजनाको ६० प्रतिशत निर्माण कार्य सम्पन्न भएको छ । २०७५ साल देखि निर्माण कार्य सुरु गरीएको सो आयोजनाको कामले तिव्रता पाए सँगै  ६० प्रतिशत काम सम्पन्न भएको हो ।

 

आयोजनाको सिस्ने गाउँपालिका–५ देउराली ओडारनजिक विद्युतगृह निर्माण भइरहेको छ । सिस्ने–५ चोरखोलामा बनाइएको ड्यामबाट नहर निर्माण गरेर देउराली ओडार पुर्‍याइएको छ । राप्ती हाइड्रो एन्ड जनरल कन्स्ट्रक्सन लिमिटेडले आयोजना निर्माण गरीरहेको छ ।

 

आयोजनाको हेडवर्कसमा ७०, पाइपलाइनमा ७५, विद्युत्गृहमा १५, इलेक्ट्रोनिक मेकानिकलमा ४०, हाइड्रोलिक मेकानिकलमा ६०, प्रसारण लाइनमा ५० र अन्य विभिन्न काम ९० प्रतिशत सकिएको राप्ती हाइड्रोले जनाएको छ ।

 

 

विद्युतगृहदेखि सबस्टेसनसम्मको ट्रान्समिटर लाइन सर्भे सकिन लागेको  राप्ती हाइड्रोका प्रतिनिधि किरणशंकर घिमिरेले जानकारी दिए । देउरालीओडारदेखि रुकुम (पश्चिम) को मुसिकोट नगरपालिका–३ धैरेनीचौरसम्मको दूरी २० किमि छ । विद्युत प्राधिकरणले धैरेनीचौरमा बनाउने सबस्टेसनमा रुकुमगाडको विद्युत जडान गरिनेछ । आयोजनाबाट उत्पादन हुने विद्युत् २० किमि टाढाबाट वितरण हुन घिमिरेले जानकारी दिए । आयोजना निर्माण २०७७ को पुससम्म पूरा गर्ने सम्झौता छ ।