टप्सन इनर्जी को काममा खटिएको कामदार करेन्ट लाग्दा एकको मृत्यु, एक घाइते

प्रकाशित मिति : मंगल, पौष २१, २०७७
- भीमलाल श्रेष्ठ

पौष २१,भक्तपुर । भक्तपुर नगरपालिका–२ इतापाकोमा सडक बत्ती जडान गर्ने क्रममा करेन्ट लागेर एक जनाको मृत्यु भएको छ भने अर्का एक घाइते भएका छन् । घटनामा दोलखा मेलुङ गाउँपालिका–५ घर भई हाल भक्तपुर नगरपालिका–२ व्यासी बस्ने २३ वर्षीय रामकुमार बुढाथोकीको मृत्यु भएको महानगरीय प्रहरी परिसर भक्तपुरका प्रहरी नायब उपरीक्षक दीपक गिरीले जानकारी दिए। बत्ति जडान गर्ने क्रममा करेन्ट लागेर गम्भीर घाइते भएका सिन्धुली कमलामाई नगरपालिका–११ घर भई हाल काठमाडौँ बल्खु बस्ने २७ वर्षीय विक्रम मोक्तानको भने कीर्तिपुर अस्पतालमा उपचार भइरहेको उनले जानकारी दिए ।

भक्तपुर नगरपालिकामा सडक बत्ती जडान गर्न बोलपत्र पारेको टप्सन इनर्जी सानो भ¥र्याङ काठमाडौँको तर्फबाट काममा खटिएका कामदारले विद्युत्को सिमेन्टको पोलमा सडक बत्तीको मेटलको पोलसहितको बत्ती जडान गर्ने क्रममा पोलमै टाँगिएको नाङ्गो तारमा छुँदा करेन्ट लागेको बताए । दिउँसो करिब १ः३० बजे करेन्ट लागेर पोलबाट भुइँमा खसेका मोक्तानको भक्तपुर अस्पतालमा प्रारम्भिक उपचारपछि थप उपचारका लागि कीर्तिपुर पठाइएको र पोलमै टाँसिएका बुढाथोकीको भने पोलमै मृत्यु भएको प्रहरीको भनाइ छ ।

सडक बत्ती जडान गर्ने क्रममा विद्युत् लाइन काट्न नलगाउँदा, सुरक्षाको सावधानी नअपनाउँदा मजदूरको मृत्यु भएको , जोखिमयुक्त काममा कम्पनीले बीमा नगरिदिदा र सुरक्षाको साधनको प्रयोगमा जोड नदिएकोले पनि उनीहरु थप मारमा परेको नेपाल विद्युतकर्मी समाज भक्तपुरका अध्यक्ष शिव प्रसाद बालाले विद्युत संसारलाई बताए ।