काठमाण्डौका विभिन्न ठाउँमा दुई दिन विद्युत अवरुद्ध हुने

प्रकाशित मिति : शुक्र, माघ ३०, २०७७
- विद्युत संसार संवाददाता

काठमाडौं, माघ । नेपाल विद्युत प्राधिकरण अन्तर्गत बानेश्वर वितरण केन्द्रले काठमाण्डौका विभिन्न ठाउँमा दुई दिन विद्युत अवरुद्ध हुने भएको छ ।

सडक विस्तारका कार्य भइरहेको र विद्युतीय संरचना स्थानान्तरण गर्नुपर्ने भएकाले भोलि र पर्सि दिउँसो विद्युत् आपूर्ति बन्द गरिने भएको हो ।

बानेश्वर वितरण केन्द्र अन्तर्गत साँखु, गोठाटार र कोटेश्वरमा भोलि तथा कपन फिडर अन्तर्गतका क्षेत्रमा आइतबार विद्युत बन्द गर्न लागेको प्राधिकरणले जनाएको छ ।

वितरण केन्द्रले दिएको जानकारी अनुसार भोलि बिहान ११ देखि दिउँसो २ः३० बजेसम्म साँखु फिडर अन्तर्गतका विद्युत लाइन काटिनेछ ।

त्यस्तै, भोलि नै गोठाटार फिडर अन्तर्गत बिहान ११ बजेदेखि दिउँसो १२ः३० बजेसम्म र कोटेश्वर फिडरको दिउँसो १ः३० देखि अपरान्ह ४ः३० सम्म विद्युत काटिने छ ।

यस्तै पर्सि कपन फिडरअन्तर्गत बिहान ११ बजेदेखि दिउँसो १ः३० बजेसम्म विद्युत कटौती हुने छ ।