आगामी जेठदेखि अवैध रुपमा नेपाल ल्याइएका मोबाइल नचल्ने

प्रकाशित मिति : Fri-05-Mar-2021
- विद्युत संसार संवाददाता

काठमाडौं, फागुन । नेपाल दुरसञ्चार प्राधिकरणले आगामी जेठ महिनादेखि अवैधरुपमा नेपाल भित्र्याएका मोबाइल नचल्ने प्रणाली सञ्चालनमा ल्याउने भएको छ ।

प्राधिकरणले मोबाइल डिभाइस म्यानेजमेन्ट सिस्टम (एमडीएमएस) सञ्चालनमा ल्याएर अवैध मोबाइल नचल्ने बनाउन लागेको हो ।

प्राधिकरणका अध्यक्ष पुरुषोत्तम खनालले एमडीएमएस सञ्चालनको तयारी भएको बताए ।

उनले भने यो प्रणाली सञ्चालनमा आएपछि इन्टरनेसनल मोबाइल इक्विपमेन्ट आइडेन्टिटी कोड (आईएमईआई) दर्ता नभएका मोबाइल नेपालका कुनै पनि नेटवर्कमा चल्दैनन् । यो प्रणाली सञ्चालनमा आएपछि नेपालमा अवैध रुपमा भित्रिने मोबाइल चलाउन नपाइने बताए ।

हामीसँगको कुराकानीको क्रममा उनले भने यो उपकरण जडान भएपछि अवैध रुपमा मोबाइल आयात बन्द भई राजस्व वृद्धि हुने साथै मोबाइल सेवा सुरक्षित तथा भरपर्दो हुने छ ।

त्यस्तै आईकाओसम्बन्धी सन्धि तथा दूरसञ्चार ऐनको व्यवस्थाअनुसार १० हजार फिटमाथिको नेपाली आकाशमा विदेशी एयरलाइन्सहरुले पनि दूरसञ्चार सेवा प्रयोग गर्न पाउने गरी खुला गर्ने तयारी पनि भइरहेको बताए ।