उपत्यकामा अत्यावश्यक बाहेक भोलिबाट अन्य सेवा बन्द हुने

प्रकाशित मिति : आइत, बैशाख १२, २०७८
- विद्युत संसार संवाददाता

काठमाडौ, बैशाख । कोरोना सङ्क्रमण बढ्दो अवस्थालाई मध्यनजर गरेर काठमाडौं उपत्यकाका तीनवटा जिल्ला प्रशासन कार्यालयले अत्यावश्यक सेवा बाहेकका अन्य सेवाहरु भोलिबाट एक साताका लागि बन्द गर्ने निर्णय गरेको छ ।

आज बसेको काठमाडौं, ललितपुर र भक्तपुर जिल्लाका प्रमुख जिल्ला अधिकारीहरुको संयुक्त बैठकले उक्त निर्णय गरेको हो ।

काठमाडौंका प्रमुख जिल्ला अधिकारी कालिप्रसाद पराजुलीका अनुसार जिल्ला प्रशासन कार्यालयबाट प्रदान हुने अत्यावश्यक बाहेकका सेवा एक साताका लागि बन्द गर्ने निर्णय गरेको बताउँदै आगामी दिनमा कोरोनाको सङ्क्रमणको दर हेरेर निर्णय लिने बताए ।

अत्यावश्यकमा शान्ति सुरक्षासँग सम्बन्धित निवेदन र मुद्वासँग सम्बन्धित कार्य सहित अन्य अत्यावश्यक सिफारिसका सेवा सुचारु हुने उनले जानकारी दिए ।

त्यस्तै नयाँ नागरिकता, नागरिकता प्रतिलिपि र नाबालक परिचय पत्र , राहदानी विवरण तथा सिफारिश, हातहतियार दर्ता नवीकरण संस्था दर्ता तथा नवीकरण र पत्रपत्रिका दर्ता लगायतका सेवा भोलिबाट बन्द रहने छन् ।