अत्यावश्यक सवारी साधनलाई मध्यनजर गर्दै निषेधाज्ञा अवधिमा पेट्रोल पम्प खुल्ला

प्रकाशित मिति : शुक्र, बैशाख १७, २०७८
- विद्युत संसार संवाददाता

काठमाडौंँ १७ वैशाख। निषेधाज्ञा अवधिमा पनि उपत्यका भित्रका पेट्रोल पम्प खुल्ला रहेका छन् । निषेधाज्ञाका समयमा गुड्ने अत्यावश्यक क्षेत्रका सवारी साधनलाई सहजै पेट्रोलियम पदार्थ उपलब्ध गराउने उद्देश्यले काठमाडौँ उपत्यकाभित्र रहेका पेट्रोलपम्प खुला गरिएको हो ।

निषेधाज्ञाको समयमा पेट्रोलियम पदार्थ सहज र सरलरूपमा बिक्री वितरण गर्न काठमाडौँ, भक्तपुर र ललितपुर जिल्लामा रहेका पेट्रोलपम्प खुला रहने नेपाल आयल निगमले जनाएको छ । उपत्यकामा पेट्रोलियम पदार्थको आपूर्तिलाई सहज बनाउन थानकोटस्थित वाग्मती प्रादेशिक कार्यालय समेत खुला राखिएको छ ।

निषेधाज्ञा लागू हुने भएपछि बुधबार राजधानीको अधिकांश पेट्रोलपम्पमा उपभोक्ताको ठूलो लाइन लागेको थियो ।

कोरोना भाइरसको दोस्रो भेरियन्टका संक्रमितहरु उल्लेख्य बढेपछि सरकारले हिजो १६ गते विहिवारदेखि बैशाख २२ गते सम्मलाई राजधानी काठमाडौं उपत्यकामा निषेधाज्ञा जारी गरेको छ ।

निषेधाज्ञा सुरु भएसँगै उपत्यकाका तीनै जिल्लामा अत्यावश्यक कामबाहेकका गतिविधि सञ्चालनमा रोक लगाइएको छ भने अन्य जिल्लाबाट समेत प्रवेश गर्न पाइने छैन । निषेधाज्ञाको पूर्ण पालना गराउन प्रहरी चेकिङ बाक्लो बनाइएको छ । काठमाडौं भित्रिने नाकाहरुमा पनि कडाई गरिएको छ ।