माथिल्लो तामाकोशीको निर्माण सक्काएर प्राधिकरणबाट बिदा भए विज्ञान श्रेष्ठ

प्रकाशित मिति : सोम, कार्तिक ८, २०७८
- विद्युत संसार साप्ताहिक

काठमाडौं, कात्तिक । माथिल्लो तामाकोशी जलविद्युत आयोजनाका प्रमुख तथा विद्युत प्राधिकरणका उपकार्यकारी निर्देशक विज्ञान श्रेष्ठ विद्युत प्राधिकरणबाट आइतबार अवकाश पाएका छन् ।

हालसम्म सञ्चालनमा आएको आयोजनाहरु मध्ये देशकै ठूलो राष्ट्रिय गौरवको आयोजनाको निर्माण सफलतापूर्वक सम्पन्न गरेका श्रेष्ठ उमेर हदका कारण प्राधिकरणको उप–कार्यकारी निर्देशक (१२ औ तह) बाट अनिवर्य अवकाश पाएका हुन् ।

प्राधिकरणका कार्यकारी निर्देशक कुलमान घिसिङले श्रेष्ठलाई बिदाई गरेका हुन् । दोलखाको लामाबगरमा निर्माण सम्पन्न ४५६ मेगावाटको माथिल्लो तामाकोशीको लामो समय नेतृत्व गरेका श्रेष्ठलाई प्राधिकरणले औपचारिक कार्यक्रम गरी बिदाई गरेको छ । माथिल्लो तामाकोशी आयोजना डेढ महिना अघि मात्रै पूर्णरूपमा सञ्चालनमा ल्याई विद्युत उत्पादन सुरु गरेको छ ।

श्रेष्ठले ३३ वर्ष विद्युत प्राधिकरणमा बिताए । उनले माथिल्लो तामाकोशीको अलावा देशकै पहिलो जलाशययुक्त आयोजना कुलेखानीमा पनि काम गरेका थिए ।

श्रेष्ठले कुलेखानी, कालिगण्डकी लगायतका आयोजनामा काम गरेका थिए । सरकारले तत्कालिन समयमा श्रेष्ठसहितका दर्जनभन्दा बढी विद्यार्थीलाई कर्णाली–चिसापानी आयोजना निर्माण गर्ने उद्देश्यले अध्ययनका लागि भारत पठाएको थियो ।