सबैभन्दा बढी कर तिर्नेमा नेपाल टेलिकम, व्यक्तिगत तर्फ सिद्धार्थ राणा

प्रकाशित मिति : बुध, मंसिर १, २०७८
-

काठमाडौं, मंसिर । सरकारले राष्ट्रिय कर दिवस २०७८ को अवसर पारेर विभिन्न क्षेत्रमा धेरै कर तिर्ने व्यवसाय र व्यक्तिलाई सम्मान गरेको छ । यो वर्षको सर्वाधिक कर तिर्नेमा नेपाल दूरसञ्चार कम्पनी (नेपाल टेलिकम) रहेको छ भने व्यक्तिगत तर्फ सिद्धार्थ राणा रहेको छ ।

यस्तै निर्यात उद्योगतर्फ शशिरञ्जन मिश्र, डाबर नेपाल, विशेष उद्योगतर्फ गोपाल श्रेष्ठ एसियन पेन्टसले सर्वाधिक कर बुझाएर सम्मानित भएको छ ।

कृषि उद्योगतर्फ पूर्वाञ्चल एग्रो टेकले बढी कर बुझाए छ । सहकारीतर्फ छिमेक लघुवित्त वित्तीय संस्था, वाणिज्य बैंकतर्फ नबिल बैंकले सर्वाधिक कर बुझाएको छ । छिमेकबाट गणेश घिमिरे र नबिल बैंकबाट अनिल शाहले सम्मान ग्रहण गरेका छन् ।

सेवामा नोबेल हस्पिटलले पनि धेरै कर तिरेर सम्मानित भएको छ भने पर्यटनबाट तारागाउँ रिजेन्सी(ह्यात) बढी कर तिरेर सम्मानित भएको छ । भाटभटेनी पनि बढी कर तिर्नेमा परेको छ । भाटभटेनीका कल्याण गुरुङले सम्मान ग्रहण गरेका छन् ।

हिमाल पावर कम्पनीले पनि सम्मानित भएको छ । कम्पनीबाट उमेश शर्माले सम्मान ग्रहण गरेका छन् । यता व्यक्तिगततर्फ सबैभन्दा बढी कर तिर्नेमा सिद्धार्थ राणाले सम्मानित भएका छन् । उनी टाटा गाडीको नेपालको आधिकारिक बिक्रेता सिप्रदी ट्रेडिङका चेयरम्यान हुन् । सबैभन्दा बढी मूल्य अभिवृद्धि कर र आयकर बुझाउने उद्योगमा सूर्य नेपाल सम्मानित भएको छ। कम्पनीका सिनियर भाइस प्रेसिडेन्ट रवि केसीले सम्मान ग्रहण गरेका छन् । भ्याटमा अनुशासित भएको भन्दै घोराही सिमेन्टले सम्मान पाएको छ । कम्पनीका संजय बन्सलले सम्मान लिएका छन् । बीमा कम्पनीका तर्फबाट नेपाल पुनर्बीमा कम्पनी सम्मानित भएको छ ।