लगातार ओरालो लाग्यो शेयर बजार, २४ सय ५० विन्दु भन्दा तल झर्‍यो

प्रकाशित मिति : बिही, मंसिर २३, २०७८
- विद्युत संसार साप्ताहिक

काठमाण्डौ, मंसिर । लगातार घटिरहेको शेयर बजार आज बिहीवार पनि ओरालो लागेको छ । शेयर बजार परिसूचक नेप्से आज पाँच दशमलव ८४ अङ्कले घटेर दुई हजार चार सय ४९ दशमलव ९७ बिन्दुमा झरेको छ ।

आज होटल, म्युचल फन्ड र अन्य समूहको शेयर सामान्य बढे पनि अरू समूहको शेयर भने ओरालो लागेको छ । आज १२९ कम्पनीको मूल्य घटेको, ८३ कम्पनीको मूल्य भने सामान्य रुपमा बढेको छ भने १८ कम्पनीको शेयर मूल्य स्थिर रहेको छ ।

आज ६२ लाख २३ हजार कित्ता शेयर कारोबार हुँदा कारोबार रकम २ अर्ब ६७ करोड ३३ लाख ८ हजार ७ सय ९१ रुपैयाँको कारोबार भएको छ ।

आज सबैभन्दा धेरै हिमालयन डिस्टिलरीको आठ करोड ८५ लाख रुपैयाँको शेयर किनबेच भएको छ ।

आज सामुदायिक लघुवित्त र श्री इन्भेस्टमेन्ट फाइनान्सको शेयर पाँच प्रतिशतभन्दा धेरैले घटेको छ । समग्र बजार ओरालो लागे पनि सिनर्जी पावर कम्पनीको शेयर साढे चार प्रतिशतले बढेको छ ।