प्राधिकरणले असुल्यो इन्टरनेट प्रदायक कम्पनीहरुसँग करिब रु.एक करोड

  • प्रकाशित मिति : मंगल, पौष २७, २०७८
  • - विद्युत संसार संवाददाता
title

भरतपुर, पुस । नेपाल विद्युत प्राधिकरण भरतपुर वितरण केन्द्रले आफ्ना संरचना प्रयोग गरेवापत भाडा तिर्न अटेर गरेका इन्टरनेट प्रदायकसँग रु. ९६ लाख ८४ हजार ९७ असुल गरेको छ । 
प्राधिकरणको भरतपुर वितरण केन्द्रले गत साउन महिनादेखि यता कडाईका साथ रकम असुल गर्न लागेपछि १४ वटा कम्पनीहरु मार्फत रु ९६ लाख ८४ हजार ९७ भाडा असुली गरेको होे । 
 
भरतपुर वितरण केन्द्रका इञ्जिनीयर राजेन्द्र पौडेलका अनुसार भदौ महिनाबाट भाडा उठाउन थालिएको बताए । उनका अनुसार २ कम्पनीले आफ्नो नाम नखुलाई भाडा तिरेका छन् भने १२ वटा कम्पनीले नाम खुलाएर तिरेको उनको भनाई छ ।
 
भाडा तिर्ने इन्टरनेट प्रदायक संस्थाहरुमा चित्रवन युनिक केवलले रु ३० लाख ५५ हजार ६८, कनेक्ट नेपालले रु एक लाख ७७ हजार ९७५, त्रिवेणी केवल नेटवर्कले रु एक लाख ९३ हजार ८००, प्राइम नेटवर्कले रु दुई लाख तीन हजार ४००, फाइवर वल्र्ड कम्युनिकेसन प्रालिले रु एक लाख २२ हजार ४०, ब्रोडलिङकले एक लाख एक हजार ७०० र वेबसफरले रु तीन लाख पाँच हजार १०० भाडा तिरेका छन् ।
 
 यसैगरी डिसहोमले रु ६ लाख ६१ हजार ५०, पीडी एस सर्भर नेटवर्कले रु २५ हजार ४२५, सुविसु नेटवर्कले रु २२ लाख २४ हजार ६६, टेकमाइन्स कम्युनिकेसनले रु २० लाख र एन्जियटा एन सेलले रु ८५ हजार ४२८ रकम बुझाएका छन् । यस्तै नाम नखुलाउने दुई वटा कम्पनीले रु एक लाख ११ हजार ४८७ र रु चार लाख १७ हजार ५४० जम्मा गरेका पौडेलले बताए । 
 
उनले भने अझै चार वटा कम्पनी वल्र्ड लिङ्क, भायोनेट, सिम टिभी र क्लासिटेकले भाडा बुझाउन बाँकी रहेको छ । वल्र्ड लिङ्कले आर्थिक वर्ष २०७४÷७५ देखिको खम्बा प्रयोग गरेवापतको रु ६१ लाख, भायो नेटले रु ३० लाख, सिम टिभीले रु ३० लाख र क्लासिटेकले रु २१ लाख ७६ हजार बुझाउन बाँकी रहेको यी चार कम्पनीले अझैपनि भाडा बुझाउन अटेर गरिरहेको उनले जानकारी दिए । महसुल नतिर्ने कम्पनीले भाडा नतिरेमा लाइन काट्न र खम्बामा राखिएको उपकरण जफत गर्न विद्युत् प्राधिकरणसँग छलफल भइरहेको उनले बताए । केन्द्रले भाडा नतिर्ने कम्पनीको लाइन काट्ने र उपकरण जफत गर्ने कामसमेत गरेको थियो । 

प्रतिक्रिया