आज ३० अंक बढीले घट्यो शेयर बजार

प्रकाशित मिति : बुध, पौष २८, २०७८
- विद्युत संसार संवाददाता

काठमाण्डौ, पुस । केही दिनदेखि लगातार रुपमा बढ्दै गएको शेयर बजार आज भने ओरालो लागेको छ ।

आज कारोबार सुरु भएपछि केही समय बढेपनि बजार बन्द हुने समयसम्ममा शेयर बजार ३० दशमलव ५१ अङ्कले घटेर दुई हजार आठ सय तीन दशमलव ६३ विन्दुमा झरेको छ ।

ब्रोकरहरुका अनुसार, खास सुचना, तथ्य र घटनाक्रमले भन्दा पनि निरन्तर बढेका कारण आज शेयर बजारमा करेक्सन आएको जनाएको छ ।

व्यापार, उत्पादन र लगानीबाहेक अरू सबै समूहको शेयर मूल्य घटेको छ । निर्जीवन बीमा समूहको शेयर सबैभन्दा धेरै दुई सय ६६ अङ्कले घटेको छ । त्यस्तै जीवन बीमाको शेयर एक सय ९, विकास बैंकको शेयर एक सय २२, होटल तथा पर्यटनको शेयर ७८ र अन्य समूहको शेयर ७६ अङ्कले घटेको छ ।

तर शेयर बजार नेप्से घटेपनि कारोबार रकम भने उकालो लाग्दै गइरहेको छ । आज दुई सय २९ वटा कम्पनीको एक करोड ६१ लाख कित्ता शेयर आठ अर्ब तीन करोड रुपैयाँमा कारोबार भएको छ । सबैभन्दा धेरै नेपाल बङ्गलादेश बैंकको २८ करोड रुपैयाँ बराबरको शेयर किनबेच भएको देखिन्छ ।

घटेको बजारमा पनि कर्पोरेट डेभलपमेन्ट बैंक, निफ्रा, नारायणी डेभलपमेन्ट बैंक र मध्य भोटेकोशीको सेयर मूल्य १० प्रतिशतले बढेको छ भने सबैभन्दा धेरै गुमाउनेमा हिमालयन उर्जा, युनियन हाइड्रो, जोशी हाइड्रोका शेयरधनी रहेका छन् । हिमालय ऊर्जा विकास कम्पनीको शेयर सबैभन्दा धेरै ६ दशमलव २१ प्रतिशतले घटेको छ ।