भारतबाट पेट्रोलियम पदार्थको मूल्यसूची बढेर आयो

प्रकाशित मिति : मंगल, माघ १८, २०७८
- विद्युत संसार संवाददाता

काठमाडौं, माघ । भारतीय आयल कर्पोरेशनले आज पुन पेट्रोलियम पदार्थको बढेको मूल्यसूची पठाएको छ ।

नेपाल आयल निगमलाई प्रत्येक महिनाको १ र १५ तारिखमा पेट्रोलियम पदार्थको नयाँ मूल्यसूची पठाउने गरेकोमा कर्पोरेशनले आज नयाँ मूल्यसूची पठाएको हो ।

निगमलाई प्राप्त मूल्य सूचीअनुसार पेट्रोलको मूल्य प्रतिलिटर ४.९२ रुपैयाँ, डिजेलको मूल्य प्रतिलिटर ७.२४ रुपैयाँ तथा मट्टितेलमा ८.८० रुपैयाँ बढेर आएको आयल निगमले जनाएको छ ।

यस्तै, हवाई इन्धनको मूल्य प्रतिलिटर ७.४८ रुपैयाँ र खाना पकाउने एलपी ग्यासको मूल्य प्रतिसिलिन्डर ८२ रुपैयाँ घटेर आएको छ । कर्पोरेशनबाट प्राप्त नयाँ मूल्य सूचीअनुसार अन्य सबै पेट्रोलियम पदार्थको मूल्य बढ्दा एलपी ग्याँसको मूल्य भने घटेर आएको निगमले जनाएको छ ।

प्राप्त नयाँ मूल्य सूचीअनुसार निगमलाई पहिलेको मूल्य अनुसार अब पेट्रोलमा प्रतिलिटर १५.६९ रुपैयाँ घाटा हुने छ । यस्तै, डिजेलमा प्रतिलिटर १३.६२ रुपैयाँ तथा खाना पकाउने एलपी ग्याँसमा प्रतिसिलिन्डर ५६० रुपैयाँ घाटा हुने देखिन्छ । यद्यपी, हवाई इन्धन र मट्टितेलको बिक्रीमा भने निगमलाई घाटा नरहेको निगमले जनाएको छ । यसआधारमा निगमले पेट्रोलियम पदार्थको मूल्य यथावत् राखेमा अब प्रत्येक १५ दिनमा २ अर्ब ६० करोड रुपैयाँ घाटा व्यहोर्ने छ ।