मंगलबार देखि बिम्सटेक ऊर्जा मन्त्रीस्तरीय बैठक सुरु हुँदै

प्रकाशित मिति : आइत, बैशाख ४, २०७९
- विद्युत संसार

काठमाडौं ४ बैशाख । बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिम्सटेक) को मन्त्री तथा सचिव स्तरीय बैठक आगामी मंगलबार र बुधबार हुने भएको छ ।

बिम्सटेकमा नेपाल सहित बंगलादेश, भुटान, भारत, म्यान्मार, श्रीलंका र थाइल्याण्ड सदस्य राष्ट्र छन् । नेपाल आयोजक रहेको सो भर्चुअल बैठकमा बिम्सटेक सदस्य राष्ट्रबीच ऊर्जा व्यापार, ग्रीड इन्टरकनेक्सन (अन्तरदेशीय प्रसारण लाइन) र इनर्जी सेन्टर (ऊर्जा केन्द्र) स्थापना गरी तीनवटा मुख्य एजेन्डा छन् ।

सदस्य राष्ट्रहरु ऊर्जा व्यापारमा सहभागी हुन आवश्यक पर्ने ग्रीड इन्टरकनेक्सनको बारेमा पनि छलफल हुनेछ । एक देशको विद्युत् प्रणालीलाई अर्काे देशसँग तादाम्यता कसरी मिलाउने (ग्रीड सिंक्रोनाइजेशन) र ऊर्जा केन्द्र स्थापना गरी यी तीन विषयमा छलफल हुनेछ ।

मंगलबार सचिव स्तरीय बैठक हुनेछ भने त्यसको भोलिपल्ट बुधबार बिम्सटेक मन्त्रीस्तरीय बैठक हुनेछ । मन्त्री स्तरीय बैठकमा नेपालकी ऊर्जा मन्त्री पम्फा भुसाल सहभागी हुने तय भएको छ । दुई वर्षअघि नै हुनुपर्ने सचिव÷मन्त्रीस्तरीय बैठक कोभिड–१९ का कारण पर धकेलिएको हो ।