चिलिमे जलविद्युतको नाफा १.२३ प्रतिशतले बढ्यो

प्रकाशित मिति : सोम, बैशाख २६, २०७९
- विद्युत संसार संवाददाता

काठमाण्डौ, बैशाख । चिलिमे जलविद्युत कम्पनी लिमिटेडको नाफा १.२३ प्रतिशतले बढेको छ । कम्पनीको चालु आर्थिक वर्षको तेस्रो त्रैमासको सार्वजनिक अपरिष्कृत वित्तीय विवरणअनुसार कम्पनीको नाफा १.२३ प्रतिशतले बढेको हो ।

कम्पनीले ५२ करोड २० लाख रुपैयाँ खुद नाफा आर्जन गरेको छ । गत वर्ष यही अवधिमा कम्पनीले ५१ करोड ५६ लाख रुपैयाँ नाफा आर्जन गरेको थियो । यो हिसाबले समीक्षा अवधिमा कम्पनीको नाफा १.२३ प्रतिशतले बढेको छ ।

यो अवधिमा कम्पनीको विद्युत बिक्रीको आम्दानी १.७५ प्रतिशतले बढेर ८२ करोड ३४ लाख रुपैयाँ भएको छ । गत वर्ष यही अवधिमा यस्तो आम्दानी ८० करोड ९२ लाख रुपैयाँ रहेको थियो ।

कम्पनीको सञ्चालन आम्दानी गत वर्ष यही अवधिमा यस्तो आम्दानी ५५ करोड १८ लाख रुपैयाँ रहेकोमा यस वर्ष थोरै घटेर ५४ करोड ३२ लाख रुपैयाँ भएको छ । चुक्तापुँजी ६ अर्ब ७५ करोड रुपैयाँ रहेको कम्पनीको रिटेन्ड अर्निङ घटेर ३ अर्ब ३९ करोड रुपैयाँको भएको छ । गत वर्ष रिटेन्ड अर्निङ ३ अर्ब ५५ करोड रुपैयाँ रहेको थियो ।

कम्पनीको ईपीएस १०.२१ रुपैयाँ, पीई रेसियो २९.४० गुणा, प्रतिसेयर नेटवर्थ १५०.३४ रुपैयाँ र तरलता अनुपात १७.३१ प्रतिशत रहेको छ ।