पेट्रोलको मूल्य प्रतिलिटर रु. १८० पुग्यो, अन्यको भाउ कति?

प्रकाशित मिति : सोम, जेठ ९, २०७९
- विद्युत संसार साप्ताहिक

काठमाण्डौ, जेठ । नेपाल आयल निगमले फेरि पेट्रोलियम पदार्थको मूल्य बढाएको छ । निगमले आइतबार मध्यरात १२ बजेदेखि लागू हुने गरी इन्धनको मूल्य बढाउँदा पेट्रोलको मूल्य प्रतिलिटर रु.१८० पुगेको हो ।

निगमले पेट्रोलसँगै डिजेल र मट्टीतेलको पनि मूल्य बढाएको छ । सबैमा प्रतिलिटर १० रुपैयाँ वृद्धि गरेको हो ।

योसँगै अब प्रतिलिटर पेट्रोलको भाउ १८० रुपैयाँ पुगेको छ भने मट्टीतेल र डिजेलको भाउ प्रतिलिटर १६३ रुपैयाँ कायम गरिएको छ ।

खाना पकाउने एलपी ग्यासको मूल्य पनि प्रतिसिलिन्डर २०० रुपैयाँ बढेको छ । अब प्रतिसिलिन्डर ग्यासको भाउ १ हजार ८०० रुपैयाँ पुगेको छ ।

निगमनका अनुसार हवाई इन्धन (आन्तरिकतर्फ) को मूल्य पनि बढेको छ । प्रतिलिटर १० रुपैयाँ वृद्धिसहित १६६ रुपैयाँ तोकिएको छ ।

रसिया र युक्रेनबीच भएको युद्धका कारण अन्तर्राष्ट्रिय बजारमा प्रशोधित तेलको मूल्य निरन्तर बढ्दै गएकाले मूल्य समायोजन गरिएको निगमले जनाएको छ ।

यो समायोजनपछि पनि पेट्रोलमा मासिक १ अर्ब रुपैयाँ, डिजेलमा ३ अर्ब ४० करोड रुपैयाँ र एलपी ग्यासमा ३ अर्ब घाटा हुने निगमले जनाएको छ । मूल्य समायोजन पश्चातपनि निगमलाई एलपी ग्यासमा ३ अर्ब डिजेलमा ३ अर्ब ४० करोड र पेट्रोलमा रु १ अर्ब घाटा रहेको निगमले जनाएको छ ।