सरकारले मूल्यवृद्धिको नकारात्मक कीर्तिमान कायम गर्‍यो : पूर्वप्रधानमन्त्री ओली

प्रकाशित मिति : बिही, जेठ १२, २०७९
- विद्युत संसार संवाददाता

काठमाडौं १२ जेठ । नेकपा एमालेका अध्यक्ष केपी शर्मा ओलीले सरकारले स्थानीय निर्वाचन लगतै पेट्रोलियम पदार्थमा गरिएको मूल्यवृद्धि प्रति आक्रोश व्यक्त गरेका छन् ।

बैशाख ३० गते भोट खसाल्ने समय सम्म चुप लागेको सरकार भोट खसाएको एक हप्ता भित्रै दुई दुई पटक गरि प्रतिलिटर २० रुपियाँ सम्म मूल्यवृद्धि गरेर जनतालाई धोका दिएको उनले बताए ।

अन्तराष्ट्रिय मूल्यसमायोजन नीति विपरीत मूल्य बढाएर गठबन्धन सरकारले मूल्यवृद्धिको नकारात्मक कीर्तिमान कायम गरेको उनले आरोप लगाउदै उनले १५/१५ दिनमा मूल्यसमायोजन गरिनुपर्ने अन्तराष्ट्रिय नीति कहाँ गयो ? उनले प्रश्न गरे ।

सरकारको नीति तथा कार्यक्रमबारे प्रतिनिधी सभामा शुक्रबार बोल्दै आयल निगमको विकल्पमा निजी क्षेत्र ल्याउन सरकार आफै‌ मोटो रकमको चलखेलमा लागेको पनि उनले आरोप समेत लगाए ।

आफू पहिलो पटक प्रधानमन्त्री भएको बेला समेत झुक्याएर एउटा समूह त्यो कार्यमा लागेको स्मरण गर्दै ओलीलले पछि थाहा पाएपछि त्यसलाई निष्क्रिय बनाएको उनको दाबी थियो ।

इन्धन जस्तो अत्यवश्यक वस्तुमा निजी क्षेत्रले हड्ताल गरिदिए के हुन्छ भन्दै उनले निजीकरणको विरोध गरे ।

अन्तरदेशीय पेट्रोलियम पाइपलाइनका लागि पहिलो आयोजना सकिएको र अन्य क्षेत्रमा पनि काम भइरहेको भन्दै उनले सहजतातर्फ अघि बढेको पेट्रोलियम पदार्थको कारोबार निजीलाई सुम्पिएर देशलाई खोक्रो बनाउन खोजिएको उनको आरोप थियो ।