आव २०७९/०८० को बजेट सार्वजनिक, बजेटमा विद्युत उत्पादन, प्रसारण र ग्रामीण विद्युतीकरणलाई प्राथमिकता

प्रकाशित मिति : आइत, जेठ १५, २०७९
- विद्युत संसार साप्ताहिक

काठमाडौं, जेठ । सरकारले आर्थिक वर्ष २०७९/०८० को बजेट सार्वजनिक गरेको छ । आज (जेठ १५ गते) संसदका दुवै सदनमा पेश गरेको आर्थिक वर्ष २०७९/८० को बजेटमा विद्युत क्षेत्रलाई उच्च प्राथमिकतामा राखिएको छ ।

अर्थमन्त्री जनार्दन शर्माले आगामी आर्थिक वर्षमा जलविद्युत उत्पादन, प्रसारण र ग्रामीण विद्युतीकरणलाई प्राथमिकतामा राखेर बजेट विनियोजन गरिएको बताए ।

मन्त्री शर्माले अहिले सदनमा बजेट प्रस्तुत गरिरहेका छन्, । आगामी आवको बजेट उत्पादनशील र रोजगारमुखी लक्षित गरिएको छ । बजेटमा कृषकका लागि पाँच खर्ब बराबरको लघुवित्त कोष स्थापना गरिने, उत्पादनमा आधारित अर्थतन्त्रको विकास गरी रोजगारी सिर्जनाका लागि गरिबी निवारण गर्ने, प्राकृतिक स्रोतसाधन र पूँजीको परिचालन गरी रोजगारी सिर्जना गर्ने विषयलाई बजेटको प्राथमिकतामा राखेको बताएका छन् ।

मन्त्री शर्माले यो बजेट आयातबाट उत्पादनतर्फ र वञ्चितिकरणबाट समावेशीकरणतर्फ प्रस्थान भएको भन्दै कोभिडपछिको अर्थतन्त्र लयमा फर्कन लागेको र चालू आवमा राजस्व सङ्कलन सन्तोषजनक रहेको उल्लेख गरे ।