नेपाल–भारत परराष्ट्र सचिवस्तरीय बैठक सुरुः बैठकमा कनेक्टीभिटी, बिजुली व्यापार, कृषि तथा स्वास्थ्यसहितका विषयमा छलफल हुने

प्रकाशित मिति : सोम, फागुन १, २०७९
- विद्युत संसार साप्ताहिक

काठमाण्डौ, फागुन । नेपाल भारत परराष्ट्र सचिवस्तरीय बैठक काठमाण्डौको एक होटलमा सुरु भएको छ ।

बैठक केहीबेरअघि एक होटलमा सुरु भएको हो । बैठकमा परराष्ट्र मन्त्रालयका सचिव भरतराज पौडेल र भारतीय विदेश सचिव विनयमोहन क्वात्रासहित मन्त्रालयका कर्मचारी सहभागी रहेका छन् । बैठकमा कनेक्टीभिटी, बिजुली व्यापार, कृषि तथा स्वास्थ्यसहितका विषयमा छलफल हुने बताइएको छ ।

परराष्ट्र सचिव पौडेलको निमन्त्रणमा दुई दिने नेपाल भ्रमणका क्रममा आज आइपुग्नुभएका क्वात्रा काठमाण्डौ आएलगत्तै दुई देशबीचको सचिवस्तरीय बैठकमा सुरु भएको हो ।

सचिवस्तरीय बैठकपछि आजै परराष्ट्र मन्त्रालयले आफ्नो सम्मानमा आयोजना गरेको दिवाभोजमा भारतीय विदेश सचिव क्वात्रा सहभागी हुनुहुनेछ । भोजपछि भारतीय विदेश सचिवले परराष्ट्र मन्त्री डा. विमला राई पौड्यलासँग द्विपक्षीय भेटवार्ता गर्ने कार्यक्रम रहेको छ ।

प्रधानमन्त्री पुष्पकमल दाहाल प्रचण्डसँगको भेटमा भने क्वात्राले भारतीय प्रधानमन्त्री नरेन्द्र मोदीले पठाएको निमन्त्रणा पत्र हस्तान्तरण गर्नुहुने र आज नै नेकपा एमालेका अध्यक्ष केपी शर्मा ओलीसँग भेट्ने कार्यक्रम तय भएको बताइएको छ ।