बैंकको ब्याजदर विरुद्ध उद्योगी व्यवसायीको प्रदर्शन

प्रकाशित मिति : आइत, फागुन २८, २०७९
- विद्युत संसार संवाददाता

काठमाडौं २८ फागुन । बैंक तथा वित्तीय समस्या समाधानका लागि भन्दै उद्योगी व्यवसायीहरुले विरोध प्रदर्शन गरेका छन् । बैक तथा वित्तिय समस्या संघर्ष समिति (नेपाल)ले बैंक तथा वित्तिय समस्या समाधानार्थ सरकार नियमन निकाय र बैँक तथा वित्तियसंस्थाहरुको ध्यानकर्षण गर्न आइतबार माइतीघर मण्डलामा विरोध प्रदर्शन गरिएको हो ।

विरोध प्रदर्शनमा नेपाल विद्युतीय व्यवसायी महासंघको समेत सहभागीता रहेको थियो । प्रदर्शनमा महासंघ लगायत विभिन्न जिल्लाका उद्योग वाणिज्य संघ लगायतका संस्थाहरुको उल्लेखनिय उपस्थितिमा विरोध प्रदर्शन भएको हो ।

ब्याजदरमा स्थिरता कायम गर्नुपर्ने, चालू पुँजी निर्देशका स्थगित गर्नुपर्ने, मौद्रिक नीति परिमार्जन गर्नुपर्ने, प्रिमियम दर वृद्धि नियन्त्रण गर्नुपर्ने उद्योगी एवं व्यवसायीहरुको माग गरेका छन् ।

देशमा भएको बैंक तथा वित्तिय समस्याहरु व्याजमा अप्राकृतिक वृद्धि, लगानी योग्य पूँजी र तरलताको अभाव, बैँकहरुको मनपरी आधार दर, आधारदरमा मनपरी प्रिमियम दर थप गर्ने बैंकको गलत अध्यास, आयातमा अवरोध, अव्यवहारिक चालुपूँजी कर्जा मार्ग निर्देशिका लगायत समस्याकालगि सरकार, नियमन निकाय र बैँक तथा वित्तियको ध्यानकर्षण नभएको भन्दै भन्दै उद्योगी व्यवसायीहरुले सडक आन्दोलन देखि विभिन्न विरोधका कार्यक्रमहरु आयोजना गर्दै आएका छन् ।

आइतबार भएको विरोध प्रदर्शनमा बैकिङ आतंक बन्द गर, ब्याजदर हामीलाई चर्को भो ! गरिखान गाह्रो भो !, प्रिमियमदर वृद्धि नियन्त्रण गर लगायतका नारा लेखिएका प्ले कार्ड प्रदर्शन गरेका छन् ।