संघको सातौं अधिवेशन चैत २५ गते हुँदै, निर्वाचन तालिका सार्वजनिक

प्रकाशित मिति : बुध, चैत १५, २०७९
- विद्युत संसार

काठमाडौं १५ चैत । काठमाडौं विद्युतीय व्यवसायी संघको तेह्रौं वार्षिक साधारण सभा एवं सातौं अधिवेशन हुने भएको छ । संघले एक सूचना जारी गर्दै संघको साधारण सभा एवं अधिवेशन चैत २५ गते शनिबार सूर्य इभेन्ट धुम्बाराहीमा हुने जनाएको छ ।

वर्तमान कार्यसमितिको दुई वर्ष कार्यकाल सकिएसँगै अधिवेशनले नयाँ कार्यसमिति सदस्य पाउँदैछ । निर्वाचनका लागि संघले निर्वाचन तालिका सार्वजनिक गरेको छ । निर्वाचन तालिका अनुसार अन्तिम मतदाता नामावली प्रकाशन चैत २४ गते शुक्रबार २ बजे गरिने छ । जसका लागि उम्मेदवारी मनोनयन पत्र वितरण चैत १९ आइतबार उम्मेदवारी मनोनयन पत्र दर्ता २० गते अपराह्न ३ बजे, मनोनयन पत्र दर्ता भएका उम्मेदवारहरुको नामावाली प्रकाशन सोही दिनकै ४ बजे, उम्मेदवारको दाबी विरोधमा उजुरी दिन सक्ने २१ गते एक बजे, उम्मेदवारहरुको नामावली प्रकाशन सोही दिनको २ बजे र उम्मेदवारले आफ्नो उम्मेदवारी फिर्ता लिन २२ गते अपराह्न २ बजे तोकिएको छ । संघले प्रकाशित गरेको सूचना अनुसार मतदान बन्दसत्र समापन लगतै साधारण सभा हलमा सुरु हुने जानकारी दिइएको छ ।

संघले अधिवेशनका लागि संघको सदस्यको हैसियतले आफ्नो फर्म÷कम्पनीको तर्फबाट प्रतिनिधित्व हुने गरी संघको विधानको परिच्छेद–४ दफा ११ उपदफा ४ (ग) अनुसार नियुक्त गरी लिखित प्रतिनिधि पठाउन सदस्यहरुलाई आग्रह गरेको छ ।