गण्डकी गाउँपालिकाबाट सर्वसम्मत प्रतिनिधि चयन

प्रकाशित मिति : आइत, असोज ७, २०८०
- विद्युत संसार संवाददाता

गोरखा । नेकपा एमालेको आगामी असोज १५ र १६ गते पोखरामा हुने गण्डकी प्रदेश अधिवेशनको लागि गोरखाको गण्डकी गाउँपालिकाबाट सर्वसम्मत प्रतिनिधि चयन गरिएको छ । हिजो शनिबार बसेको गाउँपालिका कमिटीको बैठकले सर्वसम्मत ४ जना प्रतिनिधि चयन गरेको हो । प्रतिनिधिहरुमा महिलातर्फ रेणुका नहर्की, दलिततर्फ सुरेन्द्र बिक र खुल्लातर्फ विष्णुप्रसाद पन्त र गोपाल पाण्डे रहेका छन ।

नेकपा एमाले गण्डकी गाउँपालिकाको निर्वाचनका लागि २०८० असोज ०४ गतेको जिल्ला कमिटीको सर्कुलर अनुसार तीन सदस्यीय निर्वाचन मण्डलको कमिटी गठन गरिएको थियो । निर्वाचन कमिटी संयोजक सितलबाबु रेग्मी ,सदस्य लिला बहादुर पाण्डे र सदस्य विण्णुप्रसाद रेग्मीलाई अख्तियारी दिएको थियो ।

नेकपा एमाले गण्डकी गाउँपालिकाको २०८० सालमा नबिकरण पार्टी सदस्य संख्या २७९ रहेको थियो । जसमा दलित तर्फ ३१ सदस्यको नबिकरण भएको थियो । प्रदेश कमिटीले निर्धारण गरेको मापदण्ड अनुसार उत्पीडित(दलित)तर्फ १ जना,महिला १ जना र खुल्ला तर्फ २ जना को प्रतिनिधि चयन गर्न पाउने व्यवस्था बमोजिम गण्डकी गाउँपालिकाले चयन गरिएको हो ।

प्रदेश अधिवेशनको लागि पार्टी सदस्यहरु नविकरणको आधारमा उत्पीडित(दलित)तर्फ ६० सदस्य बराबर १ जना र अन्य खुल्ला तर्फ १०० जना बराबर १ जना प्रतिनिधिको मापदण्ड कायम गरिए अनुसार र प्रतिनिधिको हकमा भने ३ सदस्य प्रतिनिधि भएमा १ जना महिलाको अनिवार्य प्रतिनिधिको व्यवस्था गरिएको थियो ।