काठमाण्डौ, चैत । काठमाण्डौ महानगरपालिकाले अब सार्वजनिक बसमा प्रयोग हुने कागजी टिकटलाई विद्युतीय टिकटले विस्थापन गर्ने भएको छ । महानगरपालिकाको नगर सभाको चौथो अधिवेशनबाट स्वीकृत काठमाण्डौ महानगरपालिका  सवारी तथा यातायात व्यवस्थापन ऐन २०७५ मा  कागजी टिकटलाई विद्युतीय टिकटले विस्थापन गर्ने उल्लेख गरेको हो ।

शहरी यातायात सेवा सर्वसाधारणको सहज र सुविधाजनक पहुँच सुनिश्चित गर्ने उद्धेश्यले जारी गरेको ऐनमा सार्वजनिक सवारीमा यात्रा गर्ने यात्रुले अनिवार्य टिकट लिनुपर्ने, कागजी टिकटलाई विद्युतीय टिकटले विस्थापन गर्नुपर्ने, बालबालिका, जेष्ठ नागरिक, अपाङ्गता भएका व्यक्तिलाई परिचय पत्रका आधारमा सहुलियत उपलब्ध गराउनु पर्नेछ,सार्वजनिक यातायातले तोकिएको स्थानमा मात्र यात्रु चढाउने तथा ओराल्ने, चालक र सहचालकलाई पोशाक उपलब्ध गराउने, यात्रुलाई गुनासो गर्ने व्यवस्था मिलाउने, प्राथमिक उपचार सामाग्री, अग्नि नियन्त्रण उपकरण, फोहोर फाल्ने भाँडो अनिवार्य राख्नु पर्ने व्यवस्था गरिएको छ । 

महानगरको सभाबाट स्वीकृत ऐनले सार्वजनिक यातायात कात्तिकदेखि माघ मसान्तसम्म बिहान ५ बजेदेखि राति ९ बजेसम्म र बाँकी महिना बिहान ५ बजेदेखि राती १० बजेसम्म बस सेवा सञ्चालन गर्नुपर्ने ऐनमा उल्लेख छ । साथै ऐनमा यात्रु, चालक र परिचालकका कर्तव्यहरू पनि उल्लेख छन् । टिकट काटेर मात्र यात्रा गर्ने, यात्राका क्रममा उत्पादित फोहोर तोकिएको स्थानमा मात्र फाल्ने, अरूलाई असर हुने क्रियाकलाप नगर्ने, यात्राका क्रममा मदिरा तथा सूर्तिजन्य वस्तुको सेवन नगर्ने, अश्लील नबोल्ने, यौनजन्य हिंसा नगर्ने, लागूऔषधको ओसारपसार नगर्ने आचरणलाई यात्रुको दायित्वमा राखिएको छ । 

 

त्यस्तै पोशाक लगाएर मात्र सवारी चलाउने, जथाभावी यात्रु चढाउने र ओराल्ने वा जथाभावी पार्किङ् नगर्ने, अश्लील नबोल्ने, अश्लील गीत नबजाउने, अश्लील फोटो नटाँस्ने,रुट स्वीकृत नपाएका सडकमा नजाने, मदिरा तथा सूर्तिजन्य वस्तुको प्रयोग नगर्ने, यौनजन्य दुव्र्यवहार नगर्नेजस्ता दायित्व चालकको आचरणमा राखिएको छ । त्यस्तै महानगरसँग स्वीकृति नलिई कुनै पनि सवारीमा प्रचार प्रसारका सामग्री राख्न नपाइने समेत विधेयकमा उल्लेख गरिएको छ ।