मस्र्याङ्दी काठमाडौं प्रसारण लाइनको काम अन्तिम चरणमा

प्रकाशित मिति : Fri-27-Dec-2075
- Admin

गोरखा,चैत । २२० केभी को मस्र्याङ्दी –काठमाडौं प्रसारण लाइनअन्तर्गत गोेरखातर्फ पर्ने ३३ किलोमिटर क्षेत्रमा करिब ९० प्रतिशत काम सम्पन्न भएको छ । आयोजनाका इञ्जिनियर सीताराम अधिकारीका अनुसार प्रसारण लाइनमा गोरखतर्फ पर्ने क्षेत्रमा हाइटेन्सन टावर राख्ने काम करिब सम्पन्न भएकोे छ ।

प्रसारण लाइनअन्तर्गत गोरखातर्फ पर्ने गण्डकी गाउँपालिका, शहीद लखन गाउँपालिका र गोरखा नगरपालिका क्षेत्रमा टावर राख्ने काम अन्तिम चरणमा पुगेको उनले जानकारी दिए । उनका अनुसार गोरखा क्षेत्रमा ६६ हाइटेन्सन लाइन निर्माण गर्नुपर्नेमा अहिलेसम्म ६३ निर्माण भइसकेको र बाँकी तीन टावर निर्माण पनि करिब एक हप्ताभित्रमा सम्पन्न गर्ने बताए ।

गोरखा जिल्लाका तीन गाउँपालिका हुँदै काठमाडौंको मातातीर्थसम्म पुग्ने प्रसारण लाइनको ३३ किलोमिटर क्षेत्र गोरखा जिल्लामा पर्छ । ‘गोरखातर्फ तार तान्ने काम मात्रै बाँकी रहेको बताउँदै इन्जिनियर अधिकारीले भने, लगभग सात किलोमिटर जति तार तान्ने काम पनि भइसकेको छ ।’ आयोजनाले तनहुँको आबुखैरेनी गाउँपालिका स्थित मार्की चोक र काठमाडौंको मातातीर्थमा सबस्टेशन निर्माण गरी प्रसारण लाइन निर्माणको काम अघि बढाएको थियो । जसअन्तर्गत मार्की चोकदेखि मातातीर्थ सम्म कुल २३१ हाइटेन्सन टावर निर्माण गर्नुपर्ने इञ्जिनियर अधिकारीले बताए । आयोजनाको दुवै सबस्टेशन निर्माणको काम समेत करिब ७० प्रतिशत सम्पन्न भएको जानकारी छ । कुनै प्राविधिक समस्या नभएमा आगामी छ महिना भित्रमा मस्र्याङ्दी–काठमाडौं २२० केभी प्रसारण लाइन निर्माण सम्पन्न हुने इञ्जिनियर अधिकारीले बताए ।