राजधानीमा ५ दिने फर्निचर तथा फर्निसिङ एक्स्पो हुँदै

प्रकाशित मिति : Wed-29-Jan-2076
- विद्युत संसार संवाददाता

बैशाख,काठमाण्डौं । राजधनीको भृकुटीमण्डपमा आगामी भदौ अन्तिम सातामा फर्निचर तथा फर्निसिङ एक्स्पो हुने भएको छ ।

आज आइतबार नेपाल फर्निचर तथा फर्निसिङ संघले राजधानीमा पत्रकार सम्मेलन गरी ५ दिनसम्म एक्स्पो सञ्चालन गर्ने जनाएको हो ।

संघले विगत ६ वर्षदेखि निरन्तर रुपमा फर्निचर तथा फर्निसिङ एक्स्पो आयोजना गर्दै आइरहेको छ । आगामी भदौ २५ गते बुधबारदेखि २९ गते सम्म हुने एक्स्पो सातौं संस्करणको एक्स्पो रहेको आयोजकले जनाएको छ ।

नेपाल फर्निचर तथा फर्निसिङ संघका अध्यक्ष रुपेश प्रधानले बढ्दो आधुनिक जीवनशैलीसँगै बढ्दै गएको इन्टेरियर डिजाइनका लागि एक्स्पो उचित गन्तव्य हुने बताए । उनले भने मौलिक तथा परम्परागत फर्निचरका साथै आधुनिक शैलीका फर्निचरका उत्पादनका बारेमा जानकारी लिन सेवाग्राहीलाई एक्स्पो उचित गन्तव्य हुने छ । किचन, बेडरूम, बाथरूमका साथै आउटडोर फर्निचर, इण्टेरियर डिजाइनर, कार्पेट, मार्बललगायत सामग्री प्रदर्शनीको मुख्य आकर्षण रहने बताउँदै नेपाली उत्पादनलाई प्राथमिकतामा राखिदिन आम उपभोक्तालाई आग्रह गर्दै उनले नेपाल फर्निचरमा आत्मनिर्भर हुने बाटोमा अघि बढेको बताए ।

यसैगरी कार्पेट, पर्दा, म्याट्रेस, डेकोरेशन सामग्री, होम डेकोर, अफिस फर्निचर, होम अप्लाइन्सेज, मेशिनरी औजारका साथै वास्तुसँग सम्बन्धित उत्पादन प्रदर्शनीको आकर्षण बन्ने आयोजकले जनाएको छ । प्रदर्शनीमा फर्निचरको प्रदर्शनी मात्र नगरी त्यसका उपयोगिता, प्रयोग विधि, बनोटका बारेमा पनि अवलोकनकर्तालाई जानकारी गराउने मेलाका संयोजक मनिष अग्रवालले बताए । यसबाहेक फर्निसिङ व्यवसायमा आधुनिक प्रविधि भित्र्याउँदै फर्निचरजन्य उत्पादनमा मुलुकलाई आत्मनिर्भर बनाउन एक्स्पोले टेवा पुर्याउने अपेक्षा गरिएको अग्रवालको भनाई थियो ।

एक्स्पोको व्यवस्थापन इभेण्ट सोलुसन प्रा.लि.ले गर्नेे छ । इभेण्ट सोलुसन प्रा.लि.का प्रबन्ध निर्देशक विजय सागर प्रधानले फरक शैलीमा एक्स्पोको सातौं संस्करण आयोजना हुन लागेको बताए । फर्निचर क्षेत्रको प्रविधि अवलोकनकर्ताको मूख्य आकर्षण बन्न सक्ने उनको भनाई छ ।

५ दिनसम्म चल्ले एक्स्पोमा स्वदेशी तथा विदेशी गरी डेढ सय फर्निचर र फर्निसिङजन्य सामग्रीका स्टल रहनेछन् । नेपालमा उपलब्ध फर्निचर तथा फनिर्सिङका उत्पादनको प्रवद्र्धन गर्ने उद्देश्यले सन् २०१२ देखि नियमित रुपमा एक्स्पो आयोजना हुँदै आएको छ ।

नेपालमा वर्षेनी फर्निचर तथा फनिर्सिङका उत्पादनहरुको ४० अर्ब रुपैंया बराबरको कारोबार हुने गरेको आँकलन छ । जसको झण्डै ५० प्रतिशतभन्दा बढी विदेशी फर्निचर आयात भईरहेको छ ।